تصرقع بلا حدود (قصة باللهجة البحرانية)

[فاقدة الحنان]

اسم القصة (تصرقع بلا حدود)
راح أعرفكم قبل ما أدخل في القصة عن الشخصيات الموجودة ..

بيت حجي مكي يتكون من الأب حجي مكي وهو رجال متقاعد طيب القلب وحنون ولكن أغلب الأوقات يكون في القهوة الشعبية مع الشيوبة أو في المزرعه، والأم فخرية هادي عاد ما يحتاج أعرفكم عنها لأنكم بتتعرفون عليها في احداث القصة وبتشوفون سوالفها،وبتهم الوحيدة زهرة وهي آخر سنة توجيهي علمي وبعد بتتعرفون عليها أكثر في أحداث القصة.

والحين ننتقل إلى بيت حجي صالح اللي هم جيران بيت حجي مكي و يتكون من الأب حجي صالح رجال متعصب شوي وهو بعد متقاعد وأغلب مشاويره تكون مع حجي مكي, والأم مليحة تقدرون تقولون انها وحده على نياتها مسكينه لا تكش ولا تنش والكلمة الأولى والأخيرة في البيت هي كلمة حجي صالح, ووالولد الطايش حسن مخلص ثانوية ولكن يحوم في الشوارع لا شغلة ولا مشغلة، والبت زينب هي بعد توجيهي علمي وتكون مع زهرة في صف.

الجزء الأول

الساعة 4 العصر
في بيت حجي مكي

الأم فخرية وبتها زهرة قاعدين يفرفرون في القنوات يدورون شي يطالعونه..

زهرة: اففف وش هالحاله هالتلفزيون مافيه شي نطالعه، بعدين أني ما قلت ليش ابي تركبون ليي نت هاا حقويش ما قلتين الى ابويي

الأم فخرية: روحي ولي مناك ودي ليي داك المسلسل الحين بيحطونه

زهرة: أي مسلسل وانتين بعدين وش عرفش بالمسلسلات

الأم فخرية: عبالش بهيمة ما افتهم يلا وديه داك الي فيه اثنينه يحبون بعض

زهرة: يحبون بعض بعد هاا ..وبعدين كل المسلسلات فيها ناس يحبون يعني تقصدين أي واحد

الأم فخرية : هداك اللي بعدين يسافر اياها ويهربون

زهرة في خاطرها: يلا خذ هالعجوز حافظة المسلسل حفظ ما يفوتها شي

الأم فخرية : انزين زهرو حبيبتي قومي سوي لينا جاي عشان نشربه واحنا نطالع المسلسل لا يفوتش ترى حلييو

زهرة : حلفي بعد قاعده وتتشرطين عليي ماني مسويه جاي اكو عندش الماي شربي فيه لين ما تنبطين

الأم فخرية : قومي يا طايحة النصبة لا أقول لأبوش يا الخايبة

زهرة: ياعليي هذا الي بتذبحني متى أفتك منكم يا ربي

وتوها بتقوم زهرة الا تلفونها يرن على الهزاز، والأم حست بشي يتحرك صوب ارجولها جان تطفر من الزهقة

الأم فخرية: ويلي يا بويي هذا ويش بعد الي تحتي يتنافض

زهرة وهي ميتة ضحك على امها: هههههههههههههههههههههههههههههه ويلي ههههه اااه اماه بتدبحيني من الضحك ماني قادره بطني بطني ههههههه

الأم فخرية: وصاقعة تصقعش أني قاعده اتنافض وانتين تتكركرين ليي قومي اهوو شوفي ويش هذا الي تحتي

زهرة: ههههههههههههه امااه هذا تلفوني حاطتنه على الهزاز ويرن جدي

الأم فخرية: وش رنقته بعد هالهزاز والخضاض

زهرة: هذا الله يسلمش داخل التلفون فيه شي يهتز مثل البيت الهزاز

الأم فخرية : يمه يخوف..هالغرب ما خلوو شي الا ودخلوه في التيلفونات .. أمس جاية ليي وحاطه اغنية واليوم حاطه ليي البيت الهزاز..وأني تيلفوني ما يصير فيه جدي بعد!!

زهرة : عفر عجبتش السالفة امااه.. ايه فيه تلفونش

الام فخرية: حطي ليي عجل جان اروح الى مليحة وافوشر عليها شوي هيي للحين ما وصلها التطور يا بتي

زهرة: صدق انكم عجايز

الأم فخرية : ويش قلتين يا سودة الوجه

زهرة : لا اماا ولا شي أقول جيبي تلفونش بسويه ليش هزاز


في بيت حجي صالح


حجي صالح: مليحة ملييحة ووينش...

الأم مليحة: ها حجي صالح ويش فيك تصارخ:

حجي صالح: ولدش حساانوو حسّن الله قرعته وينه راح راحت روحه

الأم مليحة : ما ادري عنه ولدك مسوي البيت فندق يدخل ويطلع ولا يقول وينه رايح ولا من وينه جاي واني بعد ما اقدر عليه

حجي صالح: هذا ولدش ما ينفع اياه الطيب ما ينفع اياها الا الشدخ والمشادخ طايح الحظ

الأم مليحة : يعني هو ويش مسوي!!

حجي صالح: مسوي سواد وجهه اللي ما يستحي

الأم مليحة : يووو ولدي اسود وجه >>> مسكينه على نياتها

حجي صالح : عجل انااا... رايح مغازل بنات بيت حجي أحمد

الأم مليحة : حريقة صاااقعه ولدي يغازل

حجي صالح: أي انتين وش دراش بالدنيا عاد كله عبالش ولدش احسن واحد في الدنيا ملااك:mad1:

الأم مليحة : وييليي على ولدي بيضيع شبابه ما عندي الا هوو

حجي صالح : قومي عني لا ترفعين ضغطي مو قاعده ليي وتندبين حظش لكن هذا كله من دلعش الزايد ليه

الأم مليحة : اني اقوم عنك احسن ليي لا تشب فيني حريقة الحين

وشوي الا ينفتح باب الصالة ويدخل حسن وهو يغني ومكيف على الآخر>>> الأخ ما يدري بليي جاينه الحين

حجي صالح: يا حياا الله ولدي الشهم

حسن وهو يطالع روحه: هاا اناا

حجي صالح: أي هو في أحد غيرك هني

حسن وهو شاق الحلق: لا يعني بس مستغرب أول مره تقول ليي جدي

حجي صالح بخبث: لا من يوم ورايح بتسمع مثل هالكلام واكثر بعد تعال تعال في الأحضان

حسن قام يخاف منه شوي: هاا فيها السالفه أحضان بعد ..لا بالله اليوم رحت ملح .. خلني اتشهد على روحي من الحين

حسن وهو يمشي بخطوات بطئية رايح لأبوه جان يفسخ حجي صالح العقال ويطيح فيه ...

زينب اخت حسن كانت في حجرتها تراجع ومن سمعت صوت الصراخ والشدخ طلعت من حجرتها خايفه

زينب: أمااه ويش صاير اسمع صوت صراخ

الأم مليحة : روحي حجرتش وقفلي على روحش الباب ترى أبوش محترقة حمصته اليوم على أخوش روحي الحقي على عمرش لا يجي الدور عليش الحين

زينب: جييه حسن ويش مسوي!!

الأم مليحة : والله ما ادري يا بتيي يقول أبوش مشتكين عليه رايح مغازل بنات بيت حجي أحمد

زينب: يوو صدق لكن يستاهل ولدش خليه يتأدب شوي

الأم مليحة : قومي يا طايحة الحظ هذا أخوش

زينب: أي أخوي عاد مو يروح يغازل بنات الناس الصراحة أبوي برد أفادي فيه

الأم مليحة : انتين بتنجبين لا اجي بالملاس على راسش

زينب: أي اكيد ولدش وبتدافعين عنه لكن اني عادي تصفعيني بالملاس والمخمة ..هداني بقوم ادرس احسن ليي .. ريلاكس ريلاكس

الأم مليحة : وش تقولين يا خايبة النمرة

زينب: اوو نسينا بعد ما تفهمين للغة العصر

الأم شايلة المسند وبتفلعه على زينب لكن زينب سبقتها وركضت على حجرتها وقفلت الباب

اذا صار في تفاعل بنزل الباقي
اما اذا مافيه ماراح اكمل

دمتم سالمين خخخ

[فاقدة الحنان]

الجزء الثاني من تصرقع بلا حدود..


الليل الساعة 8
في بيت حجي مكي


حجي مكي: زهرة ..زهرة وينش

زهرة: نعم أبوووي تعال اني هني في الحجرة

حجي مكي: شحوالش بتي؟

زهرة: زينة أبوي وانته وش مسوي؟

حجي مكي: مدام بتي زينة أكيد أنا زين..ها مو قاصرنش شي؟

زهرة: الله يخليك أبوي حط ليي نت

حجي مكي : وش هذا بعد يطلع النت؟

زهرة: هذا واير يحطونه في الكمبيوتر وبعدين أقدر اشوف كلشي ابيه

حجي مكي: انزين الحين بقوم اجيب ليش واير من الوايرات الي عندي وبوصله<<<

زهرة: لا ابووي مو جدي السالفة

حجي مكي: عجل جيفه بعد!!

زهرة:لازم تروح بتلكو وتقدم على طلب

حجي مكي: يعني جدي جان قلتين من البداية.. ما عليه انا من باجر بروح وبسألهم عن هالسالفة ..انزين الحين قومي جهزي روحش عشان نروح بيت عمش نزور جدتش

زهرة: اففف ولازم اروح يعني

حجي مكي: أي لازم والله ما تبين النت

زهرة: لالا بقوم بقوم الحين اني ما صدقت على الله

وبعد ما تجهزوا ركبوا السيارة وراحوا بيت العم الكبير عبدالله وساكنه عنده الجدة وأول ما دخلوا البيت شافوا الجدة وسلموا عليها

الجدة: وش فيكم ما تزورونا الا في السنة حسنة

زهرة في خاطرها: بدت هالعجوز في الهدرة

الأم فخرية: عمتي تدرين بعد شغل البيت ما يخلص

الجدة: وحقويش هالخايبة ما تعاونش والله بس فالحة في طوالت اللسان

زهرة: اللهم طولش يا روح شكلها الليلة ما بتعدي على خير

حجي مكي: عيب زهرة سكتي عنها دي مرة كبيرة

زهرة: انشاءالله ابووي بسكت وبصبر والله اني وش ليي جاية جبجب بطني

الجدة: اقول يا ولدي

حجي مكي: آمري أماااه

الجدة: اني نويت أجي بيتكم أقعد ليي جم يوم بغير جو يعني

زهرة: وي وي وي وي وش قلتين ما سمعت اقين اقين

الجدة: قلت بجي بيتكم جم يوم ولا تخليني الحين اسويها سنه

زهرة: لا يا بووي ما عندنا مكان ليش و لقدوش الخايس

الجدة: عاد اني باجي وغصباً عنش رضيتين لو انرضيتين>>> بل عليها هالجدة تحب تعاند

زهرة: ما عليه لكن تعالي وبراويش نجوم الليل في عز الظهر

الجدة: يلا يا ولدي قوم نروح بيتكم

زهرة: بل بل عليش ناوية تبدين النحاسة من الحين

حجي مكي: بسش عاد انا الى متى بفهم فيش

زهرة: هادي امك واقفة ليي عضم في البلعوم ماني بالعتنهااا

الأم فخرية: عيب عليش يلي ما تستحي دي جدتش حسبت امش

زهرة: كفايه عليي ام وحده بعد يصيرون ثنتين

حجي مكي: يلا قوموا خلونا نروح



في بيت حجي صالح


زينب قاعده تطق باب حجرة أخوها ومو راضي فاتح ليها الباب

زينب: حسن افتح الباب تقول ليك امي تعال اتعشى

حسن : روحي ولي انتين بعد عن وجهي ما ابي اشوف احد ولا ابي عشى

زينب: وفرت بعد.. وراحت زينب الى امها وأبوها الصالة

الأم مليحة: ها وينه اخوش ما اشوفه جاا اياش

زينب: مو راضي يقول ما يبي يشوف احد ولا يبي عشى

الأم مليحة: جيفه بعد هو ما أكل شي أني بروح أودي ليه العشى

حجي صالح: قعدي مكانش وخليه يولي عنش هذا ما يفيد اياه الا العيون الحمرة بس انتين من دلعش الزايد ليه خربتينه

وطبعاً مليحة ما تقدر ترد على حجي صالح اذا كان معصب ، فقعدوا يتعشون وكل واحد ساكت




في بيت حجي مكي


لما وصلوا البيت نزلوا الجدة وزهرة بهاوشهم كل وحده تقول كلمة والثانية ترد عليها >>> والله حاله اياهم يعورون الراس
دخلت زهرة البيت وشدخت بأغراض جديتها على الأرض

الجدة: ونااايبة تشيلش يا العلة كسرتين أغراضي يلي ما تفهمين

زهرة: الله الله إلي يقول أغراضش الحين كلهم ماركة عالمية

الجدة: انجبي جبش ربي انجبي ياام الدواهي

زهرة: يا ربيي يا ربيي هالعجوز بتجيب ليي حاله نفسية هذا وتهوها جاية بعد الله يعييني عليش يا البلوة.. أقول جدتي

الجدة: تقلقلت حنوجش وش تبين تسوين روحش طيبه بعد لاويه

زهرة: لا بس قلت أسألش يعني أنتين مفكرة جم يوم تشرفينا

الجدة وتبي تقهرها أزيد: والله على حسب المزاج يعني لين توالمت اني ونسوان الفريق بقعد ازيد يمكن بعد افكر اقعد لنهاية عمري

زهرة: انتين بكبرش منتهيه ما ادري لمتى بتظلين جدي لكن أني أقوم عنش أبرك ليي لا يرتفع ضغطي

الجدة: ويش تقولين فيش الضغط أكوو عندي حبوب الضغط جان تبين

زهرة: والله محد رافع ضغطي غيرش

حجي مكي: يلاا أمااه أكوو أنا جهزت ليش الحجرة ..مو ناقصنش شي بعد؟

الجدة: قواك الله يا ولدي الله يحفظك.. وتأشر إلى زهرة : هيي وينه رايحه تعالي عاونيني شيلي الأغراض عني.. وسمعووا بعد هداني بروح انام ما أبي اسمع ولا صوت ورايي قعدة باجر من الصبح

زهرة: بدينا بالتشرط .. وينه بتروحين يا حظي

الجدة: ما يخصش وأمشي اهوو

زهرة: ما برد عليش

الجدة: أحسن عورتين راسي من هدرتش

[فاقدة الحنان]

الجزء الثالث من (تصرقع بلا حدود)


الساعة 12 الليل
في بيت حجي صالح


الكل راح ينام ماعدا حسن إللي يتألم من الضرب وزينب أللي تفكر بحالة أخوها .. ما هان عليها تنام بدون ما تروح تشوف أخوها فقررت أنها تجهز ليه عشى وتروح اليه

حسن: من في الباب؟

زينب: أني زينب .. حسن أفتح الباب بكلمك شوي وجايبه ليك عشى بعد

حسن: لحظة إنزين.. وراح فتح لأخته الباب ودخلت

زينب: يصير أتكلم إياك شوي

حسن: أدري وش بتقولين

زينب: إنته حقويش تسوي جذي تدري انك بهالحركة مو بس خربت على روحك ترى انته خربت علينا كلنا.. وبعدين ترضى يجي واحد من الطريق ويتعلف فيني؟!!

حسن: يخسي واحد يتعلف فيش

زينب: شفت وش كان ردك.. يعني حقويش رضيت على روحك تتعلف ببنات الناس وما رضيت عليي .. ترى مثل ما اني اختك هم بعد خواتك

حسن سكت لأن ما كان عنده رد وحس بتأنيب الضمير لأول مرة

زينب: عجل أخليك الحين بروح أنام باجر عندي مدرسة

حسن: لحظة...زينب أنا بصراحة مو عاجبتني حياتي وأبي أغيرها ومو عارف وش أسوي

زينب: بإرادتك وإصرارك تقدر تغير حياتك.. وبعدين أني في الخدمة وأدري انك تتمنى بس خدمة مني
حسن:ههههههه ويه هالوجه الي عليش مصدقة روحش بعد

زينب: تيكت إيزي يا عزيزي ترى الدنيا ما تسوى..يلا تصبح على خير وعندك الأكل أبلع فيه لين ما تشبع بس حاسب لا تاكل الصينيه

حسن: زين إلي نبهتيني بعد لا آكلها والحين يا أم كشة عطيني مقفاش وسكري الباب وراش

زينب: مالت عليك بس طول عمرك أعوج ولا بتتعدل

يوم ثاني الصبح
بالتحديد في المدرسة


زهرة: زينب تعرفين حل مسألة الريض أمس الليل أفتر راسي وأني أضرب وأقسم

زينب:أني وصلت لنص المسألة وشيرت وأبصم ليش بالعشرة اللي حليت خطأ بعد

زهرة: خطأ صح المهم اعطيني أنقل ما فيني شدة اتوقف اليوم ورى مثل المزهرية

زينب: لا يا خلف جبد أمش وجيفه تنقلينها تبين المعلمة تكفخنا ترى هادي ساحرة أم طبوب تعرف من اللي ينقل ومن اللي يغش

زهرة: جيبي أهوو عساها الموت من معلمة وهذا اللي اخترع الرياضيات على فكرة واحد غبي

زينب: جان طلعتين ذكائش الخارق عجل في حل المسألة له

زهرة: انجبي اني أصلا مافي على مخي مخميخ بس الشكوى لله

زينب: يلا يلا أكي جت المعلمة جيبي الدفتر لا تكشفنا

زهرة: عساها ريح ما تريحها ما مداني أكتب رقمين

المعلمة: صباح الخير بنات

الطالبات: صباح النور

وكملت زهرة بهدوء: على التنور يا وجه السنور

زينب: هيي انتين ناويه ننطرد اليوم

زهرة: وش عليش منها هالبقرة.. شوفي بس تنورتها حد الحد صدق وهابية..

زينب: هههههه سكتي سكتي بس اكيي تطالعنا

المعلمة: زينب وزهرة خير وش الي يضحكم ضحكونا اياكم

زينب: هاا لاا بس هادي زينب تسألني عن المسألة تقول ما عرفت تحلها

زهرة: الله يغربلش يا الهبلة طول عمرش ما تفهمين ولا بتعرفين تجدبين

المعلمة: زهرة أشوف الواجب

زهرة: معلمة آخر مرة لأن هاليومين جدتي واااجد مريضة وأمي تقابل شغل البيت يعني ما في الا أني أهتم فيها مسكينة حراام أخليها بروحها بعدين يصير ليها شي وتموت

المعلمة: بس بس لا تقعدين تألفين ليي قصص هالمرة سماح عشان جدتش المريضة بس المره الجاية بتروحين عند المديرة فاهمة

زهرة: انشاءالله


في بيت حجي مكي
عند فخرية ومليحة وضيفة الشرف الجدة


فخرية: أني بروح أجيب لينا الجاي عشان تصير القعدة حليوة

الجدة: جيبي بقصم بعد

فخرية: انشاءالله عمتي

الجدة: وش أحوالش ملووح وشحوال أولادش ورجلش العسر>>> ملقوفة ما تعرف تجود لسانها.. ما تنلام زهرة

مليحة: الحمد لله كلهم بخير بس حقويش تقولين عن رجلي عسر

الجدة: واني الصادقة ما جدبت

مليحة: الله يهديش

الجدة: جايفتني مجنونة عشان الله يهديني

مليحة: عجل الله لا يهديش

الجدة: ولا يهديش>>> يا حبها هالجدة للمشاكل .. كبرت وخرفت

فخرية: أكووو جبت الجاي والبقصم سويت جاي حليب بعد

الجدة: زين سويتين

وقعدوو أكل ومرعى وقلة صنعى.. سالفة ورى سالفة ما يتعبون.. وشوي الا فخرية تهتز

الجدة: يا علي ابن ابي طالب وش فيش تتهزهزين وتتخضخضين مثل جربة اللبن

مليحة: ويش فيش عفر فخروو تترقصين لينا

فخرية: لا ما فيني شي بس هذا تيلفوني حاطتنه على الخضاض

الجدة: يا دافع البلا والبلاوي وش رنقته بعد هذا

فخرية: اوو الحين عمتي بتعور راسنا من أسئلتها .. اقول عمتي شربي الجاي قبل لا يبرد بعدين يصير بااصق

الجدة: اهوو جيبي عن مصاختكم الزايدة
في بيت حجي صالح


حسن قاعد في الصالة ويطالع التلفزيون، فجأة أبوه دخل وهو من شاف أبوه دخل قام عشان يروح حجرته لأن ماليه وجه يقابل أبوه

حجي صالح: حسن وينه رايح؟!

حسن وقف : نعم أبووي آمر

حجي صالح: تعال اقعد بكلمك

حسن: انشاءالله.. تفضل أبووي>>> نازل عليه الوحي!!

حجي صالح: يا ولدي إنسى اللي صار أمس بس أبيك ما تكرر هالغلط مرة ثانية

حسن: مسامحة أبووي

حجي صالح: وبعدين إلى متى بتقعد جدي عطال بطال والله عاجبتنك قعدت البيت

حسن: لا أبووي بس أنا قدمت على كذا شغلة وكل شغلة أقدم عليها يقولون ليي ما نحتاجك واللي يقول ليي اذا احتجنا ليك بنتصل.. يعني يقصدون انته على الفضيل بنبدي أول في تشغيل الجلف وبعدين اذا احتجنا خمام أو مقهوي بنتصل ليك والمعاشات على روبية ونص>>> دخلنا في السياسة

حجي صالح: الله كريم يا ولدي.. انزين روح قدم في جيان يقولون هناك اللي يقدم ياخدونه وبعدين انشاءالله بتحصل شغل غيره

حسن: بروح أقدم وأمري لله

حجي صالح: بارك الله فيك يا ولدي..انته لازم ما تيأس ولا تتملل المفروض تجاهد وتشيل روحك بروحك محد بينفعك لا أنا ولا أمك

حسن: الله يطول في عمركم



نهاية الدوام أمام المدرسة
الإتجاه نحو الباصات


زينب: يلا زهروو لا يمشي الباص عناا

زهرة: حارسي شوي وش فيش بربط سير الجوتي لا انشدخ

زينب: انتين وهالجوتي جوتي سيندريلا واني ما ادري

زهرة: ويي عشتوو من حلاته جوتيها عاد..امشي امشي

وركبوو الباص وقعدووو حش وعقرة على خلق الله..

زينب: زهروو وش رايش نطلع هالاسبوع عن الملل

زهرة: وينه بتروحين القمر!! وبعدين جيفه نطلع بروحنا عفر ناويه يحشون رجايلنا

زينب: لا يا الغبغب بنخلي اخويي حسن يطلعنا ايااه

زهرة: ويش قلتين أخوش حسن.. لا يا بوويي شكلش نسيتين اللعام وش صار في سوريا ووش سوى من سوايا

زينب: بل بل وانتين للحين تتذكرين هالسالفة

زهرة: طبعاً لأنش مو انتين اللي انزفيتين محد غيري إنهااان

زينب: الله وأكبر سميتينها بعد إهانة ما صارت صرخوو عليش.. وبعدين نسيتين انه انتين اللي بديتين

زهرة: واني وش دراني انه هو قاعد تحت وبعدين شايفتني جاهلة عشان أرش الماي عليه

زينب: ههههههههههههه لا تذكريني بالموقف من اتذكره اتدحن عليكم من الضحك

زهرة: حلفي عااد سخيفة حدش

زينب: انزين الحين ما عليش من هالسالفة الي فاات مات. وحسن أكيد نساهاا

زهرة: بفكر في الموضوع

زينب: وش تفكرين بعد زهرة بلا مصاخة يوم الخميس بنطلع وبتجين اياايي مو على كيفش

زهرة:لا عجل على كيفش..انزين بس خلاص بقول لأبوويي وبرد عليش

زينب: اوكي لا تتأخرين في الرد

زهرة: يصير خير

وصلوو منطقتهم وكل وحدة نزلت من الباص وراحت على بيتها .. ومرت باقي الأيام مثل كل يوم رايحين المدرسة وراجعين من المدرسة ودراسة وكرف حق الإختبارات..

حسن قدم على جيان مثل ما قال ليه أبوه وقبلوه بس راح يبدي دوامه من أول الإسبوع، وحجي صالح إستانس لولده لأنه حس تغير شوي وقام يهتم لروحه اكثر من قبل

أما عن فخرية ومليحة كالعادة سوالف وهدرة ما تخلص، وما ننسى الجدة بعد اللي 24 ساعة عندها مصارعة مع زهرة ومسكين حجي مكي هو الحكم..



يوم الخميس المغرب

اتصلت زينب إلى زهرة عشان تخبرها أي حزة بيمرون عليها و زهرة ما صدقت من سكرت التلفون طيران على أبوها عشان تاخد بيزاات

زهرة: أبوويي أبي منك فلوس حق الطلعة اليوم

حجي مكي: وينه بتروحين بعد وأي طلعة هادي!!

زهرة: بطلع مع زينب رفيقتي وأخوها اللي بيوصلنا نسيت أبوويي توني قايله ليك داك اليوم

حجي مكي: اييي ذكرت الحين ..جم بغيتين؟؟

زهرة: انته كريم واني أستاهل<<< يا الحيالة

حجي مكي: هااش 10 دينار

الا بدخلة الجدة وسمعتهم عاد الحين وش يفكهم من حنتها

الجدة: وصااااقعة وش تسوي انته عاطي بتك 100 روبية عشان تروح تسرح وتمرح ابهم

زهرة: وانتين وش دخلش يا السووسة محد أخد رايش الحين ولا تقعدين تشوشين أبووييي عليي فاهمة

حجي مكي: زهرة قومي روحي حجرتش عن الهواش .. وقامت زهرة عشان لا تتهاوش مع جدتها وبعدين أبوها يكنسل الطلعة عليها

الجدة: تخليها على كيفها تروح وتجي ولا حسيب ولا رقيب تتفلت وبعدين لين ضاعت صيحوو عليها

حجي مكي: أماااه أنا مربي بتي عدل وأعرفها زين يعني لو ما واثق فيها جان ما خليتها تتطلع وبعدين ولد حجي صالح بوديهم وبيقعد اياهم

سكتت الجدة عنه...

على الساعة 7 طلعوو حسن وزينب من البيت..

زينب: يلا روح صوب بيت حجي مكي عشان ناخد زهرة اياناا

حسن: منهي زهرة بعد .. لا تقولين اللي رشتني بالماي في سوريا

زينب: هههههههههههههههههههه وانته للحين ما نسيت الموقف ..اي هذا هي

حسن: تضحكين بعد ويه هالفيس الي عليش ..انصحش مره ثانيه لا تضحكين بعدين تبين شنوصش

زينب: هي هي هي هي ظرييف حدددك

حسن: من زمان بس من يقدر

زينب: يلا يلا حرك نبي نروح نشوف الفيلم لا يطوفنا

حسن: عاد أنا ما اوديكم ببلاش لازم بقشيش..السينما والعشى على حسابكم

زينب: لا والله شايفنا بنك متنقل احنا تشفط على كيفك

حسن: عجل قومي نزلي البيت مافي روحة

زينب: لالا بس خلاص بندفع ليك حق البترول بس لأن ما تكفي البيزااات

حسن: خلاص لا تصيحين كل وحدة تدفع دينار

زينب: انزين ذليتنا عاد بروح أنادي على زهروو وبجي

حسن: مو تتأخرين أعرفش أنا اتطقينها سالفة اياها وتنقعيني برة.. بحسب من الواحد الى العشرة ان ما جيتين بمشي

زينب: صاروخ واني جاية..

راحت بسرعه ونادت على زهرة وركبوو السيارة

زهرة: السلام عليكم

حسن: عليكم السلام ..ها مو حاملة اياش غراش ماي هني بعد!!>>> الحبيب يستخف دمه

زينب عطت اخوها نظرة عشان يسكت وزهرة اللي قاعدة ورى زينب انصبغ وجهها ألوان قوس قزح من الفشيلة مع انها كانت مقهورة منه ..


في مجمع الدانة
بالتحديد في الباركات


حسن: يلا انزلوا بسرعه يا هوانم ما باقي شي على الفيلم

زينب: زين زين فضحتنا

زهرة: افففف وش فيه هذا اخوش مصخن والله ويش

زينب: ماعليش منه هذا كله جدي متقلب المزاج..يلا امشي لا يفضحنا

وظلوووا يمشون لين ما وصلووا صالة السينما راح حسن ياخد التذاكر وزينب وزهرة راحو يشترون النفيش وبعدين دخلوو السينما..قعدوا يطالعون الفلم وهم مندمجين...


وش تتوقعون يصير ليهم في المجمع؟؟
زينب وزهرة وش بيسوون؟؟
وحسن؟؟!!

[فاقدة الحنان]

الجزء الــرابع

وظلوووا يمشون لين ما وصلووا صالة السينما راح حسن ياخد التذاكر وزينب وزهرة راحو يشترون النفيش وبعدين دخلوو السينما..قعدوا يطالعون الفلم وهم مندمجين...

زهرة: وييع وييع لوعوو جبدي وش قاعدين ياكلون دليين

زينب: بس خلاص ما ابي اكل نفيش بطني عورني من الي شفته

زهرة: اني وش ليي داخله هالفيلم..يا بووي شوفي جيفه صاروو وجوههم تغيرت

زينب: ماني شايفه شي خلاص بغمض عيوني اخااف... زهرة

زهرة: هاا وش تبين خلينا أشوف وش صاير من دواهي

زينب: قومي نروح الحمام

زهرة: وش بتسوين في الحمام
زينب: وش بسوي بعد قومي بطني عورني من الي شفته

زهرة: انزين قولي الى اخوش احنا بنروح لا يزفنا بعدين

زينب: حسن بروح الحمام وبجي اني وزهرة أوكي... وحسن ولا يدري بالدنيا مندمج مع الفيلم

وراحوو الحمام وبعد ما طلعوو من الحمام بيرجعون السينما تعرض لهم واحد من الشباب

الشاب: شخبار يا الحلوين

زينب وزهرة ما عطوه وجه ومشوو عنه وهو وراهم

الشاب: أقول يا الحلوين عطووونا وجه عااد

وبعد ما عطووه وجه.. عاد الحين الشاب قرر يوقف في وجههم ولا يخليهم يطوفون<<< الحين بيبدي الأكشن

زهرة: نبغي نطووف

الشاب: أخيرا سمعت صوتش يا الحلووة ممكن الرقم؟!

زهرة طالعت زينب بعين بمعنى استعدي للحرب..

زهرة: تتباعد بالطيب لا اشلخ راسك بالكعب الحين

الشاب وواثق من نفسه: أول الرقم وبعدين تروحون

زهرة: أيي افاا عليك أعطيك الرقم وليش ما اعطيك واحد مثلك ما يتفوت ...وتاخد شنطتها وترفعها شوي وبتظربه ابها لكن زينب وقفتها

زينب: وش تسوين تبين توصلينا للمراكز

زهرة: خليني أأدبه قليل الأدب

وفي هاللحظة انتبه حسن للكرسي اللي جنبه وشاف مافيه أحد قعد يحاول يتصل على تلفون زينب بس للأسف يطلع عنده الشبكة مشغولة

قام حسن حمل روحه وطلع من السينما وقعد يدورهم مثل المجنون وصل قريب الحمامات وشاف أوادم متجمعه استغرب من هالوضع وراح صوبهم..وفجأة.. انصدم لما شاف أخته ورفيقتها يتهاوشون مع صبي والناس تتفرج.. دخل حسن وسطهم مثل الثور الهايج وقعد يصارخ على الصبي عاد الصبي من سمع صراخ حسن تيبس مكانه ولا عرف وش يسوي وخاف يتسطر فما حصل حل الا انه يشرد وطيران يركض لبره المجمع.. في هالحزة حسن من العصبية سحب أخته من ايدها وزينب سحبت زهرة اياها وطلعوو من المجمع، وطول ما هم يمشون أنظار الناس كانت موجهه اليهم.. ركبوو السيارة وشدخت زهرة بالباب..

حسن: ووجع كسرتين باب سيارتي..مو تحطين حمايقش في سيارتي ...وهادي آخر مرة أفكر أطلعكم بعد انتون وجوه طلعات ماليكم الا تنرزون في البيت ..ناس فاضية ما وراها الا المشاكل وعوار الراس..
زهرة في داخلها نيران تشتعل تبي ترد عليه بس احتراماً لرفيقتها سكتت...

زينب ببرود: حسن أني جوعانه امبي عشى>>> الناس في المعمعة والعروس تبي رجل..متفرغة حدها هالبنية

حسن: انجبي .. من بعد اللي صار احلموو بالعشى .. وهالحيوان نرفزني الله ياخد روحه

سكتوو.. وزهرة من داخلها تحترق تبي تصارخ ..تبي تهاوش بس في شي يمنعها...وزينب اللي تفكر ببطنها تبي أي شي بس عشان تسكت جوعها.. اما حسن كان يفكر بالموقف اللي صار ويشوف زهرة شلون كانت تهاوش الصبي...ومرة وحدة ضحك حسن بصوت عالي..

زهرة في قلبها: الحمد لله والشكر الصبي استجن وقعد!!

زينب باستغراب: اسم الله عليك أخويي وش فيك!!

حسن ومو قادر يتكلم من كثر الضحك: ههههههههههههههههههههههه لا ههههه ولا شي
بس تذكرت شي هههههههههههه والله كان شكلش فن وانتين تتهاوشين ههههههه كأنش قاعدة في حلبة مصارعة وزنبوو الحكم ههههههههه

زهرة هني انفجرت: اتصدق انك واحد سخيف وتافه وعمري ما شفت واحد مثلك

حسن حب يجننها اكثر: احم احم ادري مافي واحد مثلي لأني نادر الوجوود

زهرة وصلت حدها: لااا خلاص مااقدر اتحملك اكثر .. نزلوني هنيي نزلوني

زينب: وش فيش انتين خرفتين تبين تنزلين في هالليل بروحش

زهرة: مو شغلش اني بتصرف بخلي ابوويي يجيي ليي

حسن: مو على كيفش .. وما عندنا بنات يمشون بروحهم في هالوقت .. واذا تبين تنزلين يلا نزلي والسيارة ما بوقفها

زهرة حست بغصة في داخلها تسأل نفسها : أني وش سويت فيها عشان يعاملني جذي كل هذا لأني رشيته بالماي من غير قصد .. ما اقول الا الله يساعد زينب على هالبلوة ثقيل دم حدده

بعد ربع ساعة وصلت زهرة بيتهم ونزلت من السيارة منقهرة بدون ما تسلم على زينب وشدخت بالباب بقووة عنااد في حسن..

حسن: ورييييح كسرت باب سيارتي حشى مو اييد عليها

زينب: بس عاد حسن انته واجد زودتها اليوم.. وهي المسكينة ساكتة عنك وأكيد زعلت

حسن: لا صدقك وش رايش اروح أراضيها بعد .. ما كفاهاا الفضيحة اللي سوتها لينا في المجمع قدام الأوادم

زينب: مو هي اللي بدت هذا كله من أسود الوجه اللي ما خلانا نطوف.. وقالت ليه السالفة كامل من طأطأ للسلام عليكم

حسن: تدرين بصراحة هي حليوة بس واجد مغرورة وشايفة روحها عبالها هي ملكة جمال ..أكوو انا بعد حليو وأحلى من توم كروز بعد بس متواضع

زينب: الله والتواضع عاد توك تمدح في روحك وتقول أحلى من توم كروز

حسن: لكن عجبتني لما هاوشت الصبي لو وحده غيرها جان عطته الرقم وواصلت اياه

زينب: يوم هي عجبتك حقويش تسحبنا مثل الغنم وراك.. بس تعال لا يكون حبيتها

حسن ضربها على راسها: أنااا حسن ولد حجي صالح تهزني بنية انا البنات هم اللي يلحقون ورايي ولا اعطيهم وجه بعد مو أحبها بعد حبش برص

زينب: وي عشتوو نسينا ما كلينا .. نسيت داك اليوم التشدخ اللي جاك من أبووييي كان بسبب ويش.. وركضت لداخل البيت لأنها تدري أنها بتتكفخ

حسن: ما عليه ياأم كشه ان صدتش براويش

فاصل ونواصل

[فاقدة الحنان]

الجزء الــخامس

في اليوم الثاني
في بيت حجي مكي


الساعة 11.30 الصبح الكل قاعد في الصالة ما عدا زهرة اللي كانت قاعدة في حجرتها ومتمللة من حياتها

الجدة: وينهي زهروو اليوم ماليها حس مو من عوايدها

حجي مكي: جيي هي للحين ما قعدت لا يكون مريضة

الأم فخرية: لا مريضة ولا شي بس دلاعتها

حجي مكي: أناا بروح أشوفها .. وقام راح حجرتها

الجدة:أني باط جبدي رجلش مدلع بته واجد ..لا وجان زين تستاهل بعد

الأم فخرية: رجلي اللي باط جبدش ولدش يصير بعد.. وأحنا ما عندنا الا هالبت بعد اذا ما اهتمينا فيها بيت الجيران اللي بيهتمون فيها يعني


في حجرة زهرة

حجي مكي: ويش فيش يا بتيي اليوم ما نزلتين ايانا تحت ولا تريقتين

زهرة: شبعانة أبووي مافي مجال في بطني حق الريووق

حجي مكي: هذا كله يعني من عشى البارحة!!

زهرة: أيي أبوويي فاتك حسن أخوو زينب عشانا عشى عمرنا ما شفناه عاد هالعشى من تاكله يخليك أسبوع شبعان مو بس اسبوع الا شهر بعد

حجي مكي: أي والنعم فيه ولد حجي صالح طالع على أبوه شهم وكريم

زهرة: مو بس شهم وكريم الا بعد طيب وحنون واااجد.. والله لو شفته أبووي أمس وش مسوي فيناا ولأي درجة مهتم فينا ومخليناا على كفوف الراحة

حجي مكي: انزين يا بتيي انا رحت بتلكو وقلت ليهم عن الي تبينه وقالوو باجر بيوصلون ليش الخط

زهرة متشققة على روحها: صدق أبوويي !!

حجي مكي: أي بس عاد هاا مو تنسين دراستش السنة اخر سنة

زهرة: لا ما بنساها

حجي مكي: بارك الله فيش يلا اخليش الحين بروح المسجد أصلي


في بيت حجي صالح

زينب: أمااه اني ابي اروح الى زهرة الحين

الأم مليحة: توش امس طالعه اياها حقويش بعد تروحين اليوم

زينب: أكوو انتين كل يوم تقابلين رفيقتش فخرية

حسن ويرز الفيس اياهم: أي امااه خليها تروح تتطمن على رفيقتها تشوفها وش مسوية من عقب سالفة امس

الأم مليحة: أي سالفة؟! جيي وش صاير!!

زينب: لا أمااه مو صاير شي بس انتين ما تعرفين ولدش الهرار.. طالعت أخوها وبصوت واطي: انته وش فيك صاير ما تفهم ناوي تفضحنا

حسن يكلم أخته بصوت واطي: لا ما بفضحش مو انتين تبين تروحين الى زهرة الجين براويش التكتيك العدل

الأم مليحة: انتوون يا سودان الوجه ما تقولون ليي حقويش تتساسروون!!

حسن: لا امااه ولا شي بس أنا أقول ليها روحي تطمني على رفيقتش شوفيها شخبارها لأن أمس مسكينة كانت خايفة من الحادث اللي شفناه

الأم مليحة: لا حول الله وفي وينه الحادث ؟

حسن: على شارع المعارض والله ستر محد مات

الأم مليحة: أي الحمد لله على كل حال

زينب: ويش الحين أمااه اروح اليها؟

الأم مليحة: أي روحي ليها يا بتيي شوفي وش اخبارها

زينب اتشققت وتوها بتمشي الا حسن ساحبنها من شعرها

زينب: آآآآآآيي هدني هد الله بطنك عورت راسي

حسن: قبل لا تمشين اعطيني العمولة

زينب: أي عمولة انته بعد!!

حسن: عمولة الجدبة اللي جدبتها على امي وخليتش تطلعين

زينب: أي أفاا عليك تستاهل .. وتقوم بسرعة وتشرد عنه

حسن يصارخ: ما عليه يا زنبوو براويش طيح الله حظش عجل تقصين عليي ها




في بيت حجي مكي
بالتحديد في حجرة زهرة


زهرة: والله زين اللي جيتين ليي لأني متملله حدي

زينب: وشخبارش اليوم بعد سالفة أمس؟

زهرة: أووو يعني لازم تعكرين مزاجي .. سالفة أمس نسيتها بس أخوش المصرقع مستحيل أركب اركب ايااه مرة ثانية.. عساني لو أموت في البيت من الملل ما اطلع وهو ايانا

زينب: بل بل بل كل هالكره شايلتنه على أخوويي مسكين

زهرة: وسجينه انشاءالله قاعدة تدافعين عنه ولا كأنه مسوي شي

زينب: خلينا من هالسالفة الحين بقول ليش شي مهم صار امس عقب ما نزليتن من السيارة

زهرة متحمسة: وش صار!!

زينب: هاده الله يسلمش عقب ما نزلتين من السيارة وشدختين بالباب ودخلتين بيتكم....

زهرة: حلفي عاد بتقولين السالفة عدل لا اطير وجهش الحين بكف محترم

زينب: انزين انزين اعصابش.. بقول

زهرة: يلا قولي اني اسمع

زينب: صدق والله واني طول هالمدة عبالي انتين صمخه

زهرة: انتين صدق ما تنعطين وجه

زينب: وش فيش بس خلاص بقول .. أمس لما نزلتين قعدت احاسب أخوويي حسن على اللي سواه وبعد ما خلصت من حسابي ايااه قال ليي شي عنش وانصدمت منه لما سمعت منه هالشي

زهرة بخوف تقاطعها: وش قال عني؟؟

زينب: وش فيش خايفة!!

زهرة: مو خايفة ولا شي كملي انزين قولي وش قااال

زينب: قال انه انتين حليوة بس مغرورة وشايفة روحش ما يندرى على ويش

زهرة بارتياح: مو شي جديد ادري اني حليوة بس مغرورة لا شايف روحه مغرور عباله كل الناس مثل.. والله عاد كل من يرى الناس بعين طبعه

زينب: وش قصدش أخوويي مغرور.. لا حبيبتي أخووي التواضع فايض عنده

زهرة: أيي بااين

زينب: انزين سمعي انتين وش صار اليوم

زهرة: قولي انزين

زينب: قبل لا اجيي ليش قلت لامي عشان اجي بس ما رضت على قولتها انه امس شايفتنش حقويش اجي ليش اليوم بعد .. عاد أخوويي حسن من سمعنا نط في الوسطة وقال لامي تخليني أجي ليش

زهرة متفاعلة معاها: أي وبعدين

زينب: بعدين حسن قعد يكلمني بالعدال قال ليي روحي ليها شوفي اخبارها عاد اني استغربت يوم قال ليي جدي ولا يفوتش هو اللي جدب على أمي وخلتني اجي ليش..وتغير لهجتها إلى الفسحة : باعتقادكِ ما هو السبب الذي دفعهُ إلى ذلك يا أخيتي؟؟!

زهرة معاها على الخط: من الواضح يا أختي أنه يوجد تلاعب في الأمر؟؟

زينب: وضحي أكثر لم أفهم..

زهرة:الغباء ليس شيء جديد عليك يا بلهاء

زينب: نوريني بذكائك يا فطينة

زهرة رجعت للهجتتها: يعني أقصد انه أخووش شكله عجبته السالفة وناوي يقهرني أزيد

زينب: لا لا لا ما اعتقد جذي.. لأن من كلامه يبين انه مهتم اليش

زهرة تعوج لسانها على السوري: حزرك.. يا خبر اليوم بفلوس بكرة بنلائييه ( بنلاقيه) ببلاش

زينب وياها: ضنك هييك!!

زهرة: اييه وبعدين لشوو كل هالإهتمام الزايد والحكي بلا طعمة خلصينا يا اختي وسكري السالفة

زينب: اييه مو على نافوخي.. انتي تأمري أمر

وقعدوو يسولفون ويهروون الى الساعة 9 وبعدين زينب راحت بيتهم وصادها حسن وحصلت جم كف من الزين..

وطافوو هاليومين على خير وجاا يوم الأحد بداية الإسبوع اللي هو أول يوم لدوام حسن

[فاقدة الحنان]

الجزء السادس

يوم الأحد الساعة 6 الصبح
في بيت حجي صالح


حسن: اماااه أمااه بسرعة بسرعة جيبي الريوق أناا مستعجل

الأم مليحة: هدويش فيك يا ولدي وش اللي عاجلنك

حسن: نسيتين اليوم بروح الشغل خلاص يا أم حسن ولدش كبر وصار يشتغل بعد

الأم مليحة : وفقك الله يا ولدي وعساك على القوة انشاءالله .. انشاءالله يا ربي أشوفك معرس وأشوف أولادك بعد

حسن مستانس: أي أي أمااه زيدي من هالدعوات

زينب نازلة من الدرج: عدال بس لا تطير لينا الحين

حسن: ما يخصش ياام كشة انا أكلم أمي

زينب: عداال لا ينط ليك عرق .. وش مقعدنك من الصبح

حسن: عندي شغل

زينب: وش هالشغل اللي مقعدنك من الصبح!!

حسن: بسألش انتين مو عايشة ايانا في البيت

زينب: لا مو بشكل كلي تقدر تقول جزئياً

حسن: عجل باركي ليي اليوم أول يوم ليي في الدوام

زينب: صدق أخوويي اشتغلت.. وفي وينه.. وجم بيعطونك.. ووش بيشغلونك؟!!

حسن: بل بل عليش شوي شوي الناس يسألوون مو مرة وحدة يا المزهوقة

زينب: انزين قول قول في وينه؟!

حسن: في جيان بس للحين ما قالوا وين بيحطوني اليوم بعرف

زينب: انزين وجم المعاااش!!

حسن: انتين بس هاده همش المعااش لكن ما بقول ..

زينب: لا يكون خايف أحسدك .. ترى اني عيوني باردة

حسن: امااه يلا اناا بروح اتأخرت ما تآمرين على شي؟!

الأم مليحة: الله وياك يا ولدي

زينب: انزين تعاال ما قلت ليي جم بيعطونك!!>>> صدق حشووورة

طنشها حسن وطلع عنها .. ركب سيارته وهو يفكر شلون بيكون أول يوم في شغله وشلون بتكون طبيعة الشغل .. وهل بيرتاح للموظفين اللي اياه.. وتساؤلات وااجد كانت تدور في بال حسن ..


في المدرسة
في حصة العربي


كل وحدة قاعدة ومتمللة من حياتها لا درس عدل ولا معلمة عدلة... تشوفون اللي نايمة واللي تطرش مسجات للبنات واللي فاتحين لهم مسنجر وضرب سوالف وتعليقات..واللي يفلعون محايات.. >>> هع هع هذا حالنا احنا في الحصص

زهرة: اففف والله عورت راسنا دي تشرح ومحد منتبه ليها على الفاضي بس تشرح بعد لو شرحها حليو قلنا ما عليه

زينب: أي والله لوعت جبدنا.. زهروو ما قلت ليش

زهرة: ويش بعد!!

زينب: اخوويي حسن اشتغل واليوم أول يوم اليه

زهرة: اوو زين زين عن القعدة البطالية

زينب: ايي شكله فكر واقتنع بالكلام اللي قلناه اليه

زهرة: أي كلاام؟؟!

زينب: انه يشتغل ويعتمد على روحه من الحين ويتزوج
زهرة: حسن أخووش بيتزوج

زينب: حالياً لا بس بعدين أي يعني عقب ما يستقر ويكون روحه.. بعد الزواج مو لعبة

زهرة: أي صح صح .. بس الله يعين اللي بتاخده مسكينه أمها مدعية عليها

زينب: والله تحب أيدها ورى وقدام وتشكر ربها ليل ونهار على اخوويي الصراحة ما يتعوض ومافي مثله

زهرة: أي هو من ناحية مافي مثله أني وياش مافي مثله

وهم يسولفون طق الجرس..يعني خلصت حصة النحس العربي .. وقبل لا تطلع المعلمة قالت لهم انه عليهم اختبار يوم ثاني وعطتهم لستة الدروس المطلوبة

زهرة وهي تطالع اللستة: باااال الله ياخد روحها ما بقى شي ما عطتنا اياه تقريباًُ الكتاب كامل

زينب: بشوف جيبي الورقة.. وريح انشاءالله ما تريحها جان قالت درسوو الكتاب كامل وفكت روحها

زهرة: شرح وما تعرف تشرح بعد تتفلسف وتعطينا هالدروس كامل نراجعها

زينب: امشي امشي نروح ناكل أحسن لينا بطت جبدي هالمعلمة الغنمة

زهرة: وانتين بس هادي حياتش كله بلع في بلع ولا يفيد فيش بعد وينه يروح ما ادري

زينب: اللهم صلِ على محمد وآل محمد .. باجر بترقد في المستشفى.. أي باجر الا اليوم بترقد من عيونش

زهرة: هيي حبيبتي عيوني باردة مو مثلش


في مجمع البحرين
بالتحديد في جيان


حسن شغلووه في مكان الموبايلات.. عجبته الشغلة ,, وحب الموظف (كريم) اللي يشتغل ايااه..صدق انه خجول ويستحي يكلم بنات بس طيب ومزووح..وفي البرييك

حسن: كريم قوم جيب لينا اكل اناا جوعان حدي

كريم: اشتغل عندك انا

حسن: لا تشتغل عند جيراننا.. قوم يلا ولا تناقش وااجد
كريم: وانته وش عندك ما تروح .. ناقص اييد لو ارجوول

حسن: لا راس تصدق

كريم: لا ما اصدق .. انا بروح بس هاده من طيبي يعني مو على شانك

حسن: زين اقلب وجهك

كريم: على أي صفحة!!

حسن: ههههههه يلا روووح راحت روح العدوو

كريم: زين مع السلامة أبو الشبااب .. فاصل ونواصل

حسن: مسكين متأثر واجد بالتلفزيون

وراح كريم يشتري ليهم اكل وظل حسن قاعد بروحه ويلعب في تلفونه.. وشوي الا جاية وحدة سفوور عند حسن ..

الشابة: مرحباا أخووي

حسن: نعم أختي تفضلي..أي خدمة!!

الشابة: أي والله .. بغيت أشوف آخر موديلات نازلة عندكم>>> الاخت عبالها قاعدة في عرض أزياء

حسن طلع ليها التلفونات: أختي عندش هادي النوعية من نوكيا وهادي من موتريلا توهم نازلين..

الشابة: أشوفهم..وسوت روحها بتاخد التلفون من عنده ولمست ايده بالعمالة... اوو سوري أخووي بالغلط

حسن ما عجبه تصرفها: مو مشكلة أختي بس مرة ثانيه انتبهي>>> خخخخ احترق وجهها

الشابة بدلع: انزين اختار لي انت.. أي واحد أحلى؟!!

حسن مو قادر يبلعها: اللي يعجبش أختي اخذيه

في هاللحظة وصل كريم ومعاه الأكل .. حسن من شاف كريم ارتاح ..

كريم: ها ابو الشباب عسى ما تأخرت عليك

حسن: لا بس انته أقعد أنا بروح عندي شغلة شوي وبجي
الشابة: وين رايح تعال أختار لي على ذوقك

حسن: مو فاضي أناا أخدي الي تبينه وأمشي.. بس قبل لا تمشين لا تنسين تدفعين الحساب.. ومشى عنها

هني كريم حس انه حسن مضايق منها ويبي يتهرب منها وكان يبي يضحك على البنية اللي تفشلت من كلام حسن بس جوود روحه

كريم وشوي بينفجر من الضحك: آمري أختي بغيتين شي..

البنية من الفشلة مشت ولا عطته وجه.. كريم خلاص ما قدر يحبس ضحكته أكثر وانفجر في الضحك... بعد 5 دقايق أتصل ليه حسن

كريم وهو يضحك: هههههههههه وينه انته ما جييت

حسن: تضحك بعد هاا ..راحت أم السعف والليف

كريم: هههههههه أي مسكينه من راح القلب الا هو انته راحت هي بعد

حسن: راحت روحها ..انجب بس انته الحين جاينك وبراويك شغلك بعد.. وراح الى كريم.. أول ما شافه كريم فقعها ضحك مرة ثانية

حسن: انته للحين تضحك ضحكت بلا شنووص انشاءالله

كريم: هههههههه ما اقدر انته لو شفتها جيفه تلون وجههاا أحمر وأزرق وأصفر جان ما سكتت

حسن: خلها تولي قهرتني زين ما هفيتها بطراق على راسها أم العبل

كريم: مسكينه وش سوت ليك هههههههه !!

حسن: مو شغلك وانته حقويش تتأخر

كريم: مو شغلك..محد قال ليك ما تروح انته اللي تشتري الأكل

حسن: والله لو رايح انا اشرف ليي من مقابل هالساحرة

[فاقدة الحنان]

الجزء الســابع


في نهاية الدوام المدرسي
وفي بيت حجي مكي


الجدة وحجي مكي والأم فخرية قاعدين يسولفون على ما تجي زهرة من المدرسة..

الجدة: هدويش هادي بتش متى بتجي بطونناا لصقت في ظهورننا من الجووع

الأم فخرية: الحين بتجي عمتي اذا جوعانه بقوم بحط ليش الغدى

الجدة: لا ما احب أتغدى بروحي بتغدى أياكم

الأم فخرية: على راحتش

في هالحزة وصلت زهرة البيت وحالتها حاله العرق يزخ منها وتمشي وتجر شنطتها وراهاا..

حجي مكي: ويش فيش جدي صايرة..منهو مكفخنش!!

زهرة: الله يغربل الهندي الغبي وقف علينا الباص وما عرف يتصرف من غباءه

الأم فخرية: يووو وبعدين وش سوو ليكم

زهرة: جاا باص ثاني لينا وشالنا

الجدة: ههههه كسرتين خاطري لكن تستاهلوون

زهرة: أبوويي شوف أمك أني ما سويت شي ليها وتبدي

حجي مكي: انزين انتين سكتي جم مرة بقول ليش يعني دي مرة كبيرة ولازم تحترمينها

زهرة: افففففف متى الله ياخدني وافتك

الجدة مستانسة لأن زهرة معصبة منها: انشاءالله انشاءالله قريب

الأم فخرية: يلا زهرة روحي بدلي ثيابش وتعالي تغدي

زهرة: لا تقولين ليي غدى ما ابي شي منسدة نفسي

الجدة: لا تقولين اني اللي سديت نفسش ..ما سويت ليش شي الحين>>> كل هذا وما سوت شي

حجي مكي: وحقويش ما تبين غدى؟؟
زهرة: المعلمة طايحة الحظ عساها ما تتوفق عساها شدخة ما تقوم منها قولوا آمين

الجدة: انشاء الله ترجع الدعوة عليش ياا رب

زهرة ما اهتمت ليها وكملت كلامها: أم حمااار عاطتنيا الكتاب كامل نراجعه حق الاختبار باجر>>> لازم تبالغ

الأم فخرية: انزين تغدي اول بعدين روحي راجعي

زهرة: لا امااه ما عندي وقت يلا سي يوو

الجدة: عاد بنشوف على هالدراسة وش تطلعين.. دختورة لو مدرسة

زهرة تتفلسف على جدتها:This Is Not Your Business

الجدة: ويش تقولين تبين بسبوسة!!!

زهرة تضحك على جدتها:ههههههه أي جان بتسوين ليي ههههههه

الجدة: لا اسوي ليش ولا شي خدامتش واني ما ادري

مشت عنها زهرة وهي تضحك على جدتها والجدة تتحلطم عليها >>> الجنون فنون وقلة العقل مصيبة


في اليوم الثاني في المدرسة
في حصة العربي


المعلمة: يلا يا بنات استعدوو الحين بوزع عليكم الأوراق ولا أبي ولا صوت ولا حركة مفهووم

زهرة: يلا معلمة وزعي قبل لا تطير المعلوماات

المعلمة:قلت ما ابي ولا صوت وأي كلمة ثانية بتنحرمين من الاختبار

زهرة: ما ادري أقوم الحين وأهفها بطراااق أخليها مرة ثانية تتكلم عدل

زينب:وانتين وقتش الحين تتحججين اياهاا خليها توزع وتفكنا

وبعدين وزعت عليهم المعلمة الأوراق وقعدت تراقبهم...

زهرة : معلمة من وينه جايبه هالاسئلة البايخة..الصراحة ماليهم أجوبة في الكتاب
المعلمة: قلت الجواب في الشرح ويلا سكتي في بنات غيرش يمتحنون

زهرة في خاطرها: أي مدام قلتينه في الشرح لا بالله نجحنا أحنا في كل حصة نايمين

وبعد شوي تكلمت طالبة ثانية..

الطالبة: معلمة وضحي السؤال الخامس مو مفهووم

المعلمة: وش فيه بعد مفهووم بس قولوا انتون ما درستون

وكل شوي بنيه تسأل عن شي.. وزينب وزهرة استغلووا الفرصة وقعدووا يغشوون

زينب: هاا زهروو كتبتين الاجابة؟؟

زهرة: أي لحظة شوي

زينب: انزين اعطيني الاعراب اني مو متأكدة منه

زهرة: كتبي كتبي الأول نائب فاعل والثاني حال

زينب: وانتين وش عرفش يا الفهيمة غير انتين طرن في الإعراب

زهرة: يا الغبغب اني شايفة الأولى كاتبه جدي

زينب: أي مدام جدي ضمنا النجاح .شوفي شوفي جان بعد عندنا خطأ نصححه من عندها

زهرة: لا تخافين كل شي صح اني مشغلة راداراتي عدل

المعلمة: بس بنات ولا صوت ..الوقت خلص نزلوا الاقلام و مررووا الاوراق من ورى لقداام

وبعد انتهاء الحصة...

زينب: الله يغربلها من معلمة ما ادري من وينه جايبة الاسئلة

زهرة: أي تقهر حدها والله لو ما الغش جان احنا راسبين في الامتحان

زينب: أي والله

........
.
.

ومرت الإيام بسرعة .. وقرب موعد الامتحانات النهائية.. وطبعا زينب وزهرة يكرفون هالايام في الدراسة..يحفظون من صوب ويخرون من الصوب الثاني>>> مساكين الله يساعدهم

الجدة طول يومها قاعده ومتملله ومن الملل صارت تتهاوش بروحها لأنها ما تشوف زهرة واجد بسبب الامتحانات

وحسن اللي أغلب الاوقات يكون في الشغل أو مع رفيقه كريم و اذا كان فاضي يقعد مع اخته زينب يطنز عليها لكن دايما يشجعها على الدراسة>>> اسمع الأخ المثالي هع هع

في الأجزاء الجاية بتتطور الأحداث
تتوقعون وش بيصير فيها؟؟؟
تابعونــا وبتعرفوون!!!

[أميرالعاطفه]

يسلمووووووووووووووووووووو يالغلا
تحياتي اميرالعاطفه

[فاقدة الحنان]

ثانكس ع لمورر الحلو
انتظرا البقية

[الوفى طبعي]

تشكـرا ا ا ا ا ا اتـ خيتووووووووووووووو

:)

[فاقدة الحنان]

الجزء الثــامن

ومرت الإيام بسرعة .. وقرب موعد الامتحانات النهائية.. وطبعا زينب وزهرة يكرفون هالايام في الدراسة..يحفظون من صوب ويخرون من الصوب الثاني>>> مساكين الله يساعدهم ويساعدنا


الجدة طول يومها قاعده ومتملله ومن الملل صارت تتهاوش بروحها لأنها ما تشوف زهرة واجد بسبب الامتحانات


وحسن اللي أغلب الاوقات يكون في الشغل أو مع رفيقه كريم و اذا كان فاضي يقعد مع اخته زينب يطنز عليها لكن دايما يشجعها على الدراسة>>> اسمع الأخ المثالي هع هع
في بيت حجي صالح


كريم قاعد في بيت حسن يسولفون عن شغلهم ويطالعون اخبار العالم ..

حسن: أنا بقوم اجيب لينا شي ناكله بدال هالاخبار اللي تسد النفس

كريم: اوكي بس لا تتأخر


زينب قاعدة في حجرتها تراجع ..تمللت من قعدة الحجرة فحملت كتابها ونزلت الصالة وشغلت التلفزيون..شافت فيلم هندي وكان البطل شاروخان

زينب: الاااااي شاروخاان..بروح أنادي حسن يطالعه ايايي هو يحبه بعد

وقامت المجنونة تدور على حسن ..راحت المطبخ وشافت امها تغسل مواعين

زينب بصوت عالي: أمااه وينه حسن

الأم مليحة: وش فيش يا المستخفة تصارخين روحي راجعي

زينب: راجعت راجعت قوليي ليي وينه حسن

الام مليحة: أكو في المجلس قاعد..... وقبل لا تكمل أمها كلامها زينب طارت على المجلس..فتحت الباب بقوة .. نقز كريم من مكانه ..

زينب واقفة عند الباب وبصوت عالي: حساانووو قوووم فيلــ .... وقبل لا تكمل جملتها انتبهت انه اللي قاعدة تكلمه مو حسن.. تيبست مكانها ..حست انه قلبها وقف ما عرفت وش تسوي من الصدمة..لما صحت من الصدمة اللي هي فيها صفقت باب المجلس وركضت على حجرتها وقفلت الباب عليها من الخوف

كريم: بسم الله زهقتني وقفت قلبي .. لكن وش هالفشيلة.. أكيد هادي أخت حسن ..حليووة بعد بس ربشة.. استغفر الله انا وش قاعد أقول استغفر الله..وقعد ينتظر حسن وكان الوضع عنده طبيعي ولا كأنه صاير شي... ودخل حسن المجلس

حسن: أدري بتقول تأخرت علييك .. بس واحد من الشباب شافني وقعد يسولف ايايي أنا بعد ما قدرت أمشي عنه واخليه لازم يعني اسولف شوي

كريم: لا بارك الله فيك قاعد تسولف وماخد راحتك وانا هني بروحي

حسن يا زعم زعلان: الله يسامحك

كريم: ويسامحك

وهم قاعدين رن تلفون كريم ..كريم لما شاف الرقم ابتسم وطالع حسن

حسن: وش فيك تتطالعني وتتبسم ما ترد

كريم يرد على التلفون: هلا بعمري وحياتي

حسن استغرب من كلام كريم وصار يشك فيه انه يكلم وحده

كريم يطالع حسن وفي خاطرة يضحك على شكل حسن المنصدم:اووكي انشاءالله الحين انا جاي يلا باااي بابا

حسن راسه افتر من كلام كريم: بابا؟؟!

كريم: ههههههههههه وش فيك تطالعني مثل الأهبل

حسن: أي لاني أنا صاير مثل الاطرش قاعد في الزفة...أفاا ياخووك افاا الحين تحب ولا تقول ليي يعني انا اخر من يعلم ..والله يعلم يمكن بعد متزوج لانك كلمت جاهل وقلت ليه بابا!!

كريم ما قدر يكتم ضحكته أزيد وانفجر من الضحك على حسن...

حسن: يعني كلامي صح !! وش فسك تضحك ما تفهمني السالفة

كريم: ههههههههههههههههههههاااااااااي تصدق يبي ليك صورة

حسن: احلف عااد بتقول ليي السالفة لا ادوس في بطنك الحين

كريم: هههههههه لالا مدام فيها ضرب بقول

حسن: قول قول غرررد يا بلبل .. بس لا يكون متزوج بالسر!!
كريم: كنت متزوج بس مو بالسر

حسن: يعني مطلق!!!

كريم وعلامات الحزن بدت تظهر على وجهه: لاا يا حسن أنا كنت متزوج من 4 سنين وزوجتي توفت عند الولادة واللي كنت اكلمه من شوي ولدي حسين

حسن متلوم : الله يرحمها.. كريم انا ما كان قصدي اذكرك باللي صار بس حبيت اعرف السالفة

كريم: لا حصل خير

حسن يغير الموضوع: عجل انته ابوو يا التيس

كريم: هههههههههههههه تيس يرفسك أي انا ابوو عندك مانع

حسن: ما قلت ليي من قبل انه عندك ولد

كريم: ما كان في مناسبة عشان اقول ليك

حسن: انزين جم عمره الحين؟

كريم: عمره 3 سنوات

حسن: الله يخليه ليك

كريم: ويخليك ..يلا انا الحين بخليك وبروح بقابل القمر وحشني

حسن: الله يعني الحين صرت ما انفع

كريم: هههههههههههه امزح اياك يلا نشوفك على خير

حسن: الله وياك .. ومرة ثانيه ما تجي الا وياك حسين والله ما تدخل بيتنا وسلم عليه بعد

كريم: هههه انشاءالله يوصل

بعد ما طلع كريم راح حسن الى اخته حجرتها..

حسن: ها زينب شخبار الدراسة اياش؟؟

زينب مترددة: هاا أي زينه الحمد لله

حسن: وش فيش؟؟
زينب: هاا لا لا مافيني شي بس خايفة من الامتحان

حسن: اقري ليش ايات وقومي نامي

زينب: انشاءالله

وطلع حسن عنها وهي اطمنت انه رفيقه ما قال اليه عنها


في بيت حجي مكي
نص الليل


الكل نايم في بيت حجي مكي وزهرة ما قدرت تنام بسرعة قاعدة تحاتي الامتحان وبعد ما غطت عيونها شوي حلمت انه هي وجدتها قاعدين في صحراء بس جدتها كانت طايحة على الرمل وما تتحرك وهي تحركها وتصيح عليها...قعدت من نومها خايفة وبدون حواس راحت حجرة جدتها وحضنتها وقعدت تصيح

الجدة: ويش فيش زهرة..حقويش اتصيحين!!

زهرة: جدتي انتين صاحية ما فيش شي ما يعورش شي!!

الجدة: لا هداني قدامش مثل الخيل ..أحد قال ليش اني مريضة؟؟

زهرة: لا جدتي بس كنت خايفة عليش

الجدة: هاش شربي ماي وصلي على النبي ونامي ايايي ..انتين عفر حلمانه بحلم مو زين..لا تخافين يا بوويي
وحطت زهرة راسها في حظن جدتها وراحت في سابع نومة..

[فاقدة الحنان]

الجزء التــاسع

يوم ثاني الصبح قعدت فخرية وراحت تقعد بتها من النوم..بس دخلت الحجرة وما شافتها .. طقت باب الحمام بس محد يرد ..فتحت الباب وما شافت احد ..نزلت تحت الصالة وراحت المطبخ بعد ما شافتها..خافت فخرية على بتها.. ما تدري وينه راحت

وشوي الا طالعة الجدة من حجرتها وتطالع فخرية اللي تدور في البيت مثل المجنونة وهي خايفه على بتها

الجدة: ويش فيش فخروو تراكضين من قرنة لقرنة مثل المجنونة

الأم فخرية: عمتي الحقي عليي بتي زهرة ضاعت مني

الجدة: ضاعت!!!
الأم فخرية: ايي ضاعت ماني محصلتنها في البيت وينه راااحت

الجدة: بتش اكي في حجرتي نايمة

الأم فخرية باستغراب: في حجرتش!! وش اللي وداها حجرتش

الجدة: من امس نايمة ايايي هي

الأم فخرية: زهرة نايمة ايااش غريبة!!

الجدة: لا غريبة ولا شي واني جدتها وهي بت ولدي يعني حقويش ما تنام اييايي

الأم فخرية : عجل بروح اقعدها

وراحت فخرية تقعد بتها من النوم..

الأم فخرية: زهرة زهرة قومي روحي المدرسة

زهرة قامت وشافت روحها في حجرة جدتها..

زهرة: امااه اني حقويش نايمه هني!!

الأم فخرية: يووو اسم الله عليش يا بتيي ويش فيش عفر انتين امس نايمه ويه جدتش له!!

زهرة تذكرت اللي صار: ايي صح..انزين الساعة جم الحين؟؟

الأم فخرية: الساعة 6

زهرة: ويلي الساعة 6 وحقويش ما قعدتوني قبل الامتحااان الامتحاان بيطوفني

الأم فخرية: قومي بدال هالهدرة بدلي ثيابش وروحي المدرسة

زهرة: ايي يا ويلي نسيت كلشي بقوم اتلحق على عمري واراجع من جديد لا ارسب يا علي ياعلي اخر سنة واخر امتحان اليوم وبنفتك

الأم فخرية: أي ونعرسش مرة وحدة ونفتك منش

زهرة: ويه ويه ويه ويه ومن قال ليش ابي اعرس، لكن اني الحين مو فاضية بروح اقدم امتحاني قبل لا انسى كل شي بسبتش وبعدين نتكلم في هالموضوع

الأم فخرية: اللي يقول عاد بمشي على رايش اني روحي يلا ما باقي شي ويجي الباص


في المدرسة
في قاعة الامتحان


المعلمة: هدووء يا بنات الاوراق بتتوزع وأي وحدة تغش أو تحاول تغش راح نسوي لها محضر غش وتروح ورقتها للجنة خاصة وبعدين انتين بتتحملين المسؤولية

زهرة: حشى حشى محضر وبيودونا الشرطة بعد

زينب: أي ياختي وعفر بيودونا الآداب اذا غشينا خلاص عجل اني ما بغش قوانين جديدة مطلعين لينه

زهرة: صدق جبن هم كل سنة يقولون هالكلام عفر انتين نايمه ولا يسوون شي بعد

زينب: صدق !! عبالي قوانين جديدة

زهرة: مو منش من الامتحان اللي مو مخلي ليش حواس ياختي

المعلمة تأشر على زينب وزهرة: اللي هنيي كلمة ثانية وبتنحرمون من الامتحان مفهووم

سكتووا البنات وتوزعت الاوراق..طبعاً اليوم أخر يوم في امتحانات الثانوية وزينب وزهرة آخر سنه يعني الله يستر...من استلموا الاوراق قعدت كل وحدة تعصر في مخها لعل وعسى يطلع شي <<< امتحانات الوزارة الصراحة مو امتحانات وخصوصاً العلمي ما ادري من وين من المريخ يجيبون الاسئلة "طاااااااااح حظهم"...
وعند سؤال من الأسئلة زهرة شيرت فيه وما عرفت وش تسوي والمشكلة الأعظم أنه السؤال تندرج معاه أسئلة يعني تقريباً صفحة ونص ويا ويلتاااه إذا ما حلته طارت نص الدرجة..

زهرة في خاطرها وهي شوي وتصيح: يا علي ويش أسوي ماني عارفة.. يا علي ابن أبي طالب يا حلال المشاكل ياعلي بطني يعورني ويش أسوي بصيييح...

وزينب من الصوب الثاني في خاطرها: وناايبه تنيب الوزارة حرييييقة وش هالسؤال بعد!!

وكل وحدة ترتجف من هالسؤال ماليه حل..اللي نزل عليها الوحي حلته والباقي كلمة مني وكلمة مني ويقولون انحل أما ناس ما تعبووا روحهم ولا شي سلمووا الورقة وطلعووا من القاعة والبوز مشقوق<<< ضامنين النجاح عفر

وبعد ما خلص الوقت طلعووا من الامتحان وكل وحده تسب في الوزارة وفي اللي حط هالامتحان

زهرة: ويلي ويلي اني برسب في هالمقرر عسى اللي سواه كسر في ايده

زينب: سكتي اني اتنافض وبطني يعورني للحين خايفه هالسؤال يطلع كله خطأ وارسب
زهرة: أي صدق ويش الحل؟؟!

زينب: واني وش دراني لا تسأليني عن شي أمشي امشي نروح البيت أني جوعانه

زهرة: وأنتين كله تحاتين بطنش !!!

زينب: وش أسوي بعد أمشي نروح البيت ناكل احسن من ما أقعد وافكر في الامتحان.. واني بعد كل ما ادرس أجووع أزيد

زهرة: حشى بالوعة كله تشفطين ولا تمتنين

زينب: صلي على النبي لا تحسديني

زهرة: اللهم صلِ على محمد وآل محمد ...انتين محد يقدر يحسدش اصلا


بعد ما ركبووا الباص ووصلوا منطقتهم نزلوو عند المحطة وقعدووا يتمشون ويسولفون وهم في الطريق شافهم حسن كان راجع من الشغل ومعاه رفيقه كريم

زهرة: هذا مو كأنه اخوش حسن؟؟!

زينب: وينه؟؟ أي صح هذا هو...وانتبهت انه معاه واحد وهالشخص مو غريب عليها..مرة وحدة تغيرت ألوانها

زهرة: هيي انتين ويش فيش جدي صايرة ما تبين تروحين البيت وتعلفين يلا امشي

حسن وهو موقف صوبهم: هاا وش تسوون تتمشون في الشموس؟؟

زينب مو عارفة وش تقول من اللي شافته وظلت ساكته...دزتها زهرة عشان تتنبه إلى اخوها لأن كان يكلمها وطبعا زهرة ما تحب تتكلم مع حسن

زهرة: يا المفهية أخوش يكلمش ما تردين عليه وتفكينا ...أو تدرين اني بروح بيتنا وانتين ظلي واقفة

زينب استوعبت شوي: هاا لالا تعالي اني بروح اياش ما بروح اياه

حسن: هيي انتون ثنتينكم وش فيكم ؟؟

زينب: لا مافينا شي بس دار راسنا من الشمس

حسن: تعالوو اركبوو بوصلكم

زهرة تساسر زينب: اني وحدة ما بركب ويااه حالفة على روحي ما اركب اياااه بتركبين انتين ركبي بروحش اني بروح امشي اشرف ليي

زينب: لالا تعالي وينه بتروحين وتخليني بروحي اني بعد ما ابي اركب اصلا مدام اياه رفيقه هذا

زهرة: جيه وش صاير؟؟ وش فيه رفيقه؟؟

زينب: بعدين بعدين بقول ليش..حسن روح احنا بنروح مشي

حسن: وحقويش تروحون مشي وانا موجود!!!

زهرة: افف هذا اخوش الحين بسويها لينا قضية اني بمشي احسن ليي وخله يهدر بروحه

زينب: اني بعد بمشي اياش احسن ليي

ومشووا عنه ولا سوو ليه سالفة وهو شايل الفريق بالهرنات وكريم يضحك عليه ولما وصلوا حسن وكريم البيت قعدووا في المجلس يتغدون ويسولفون

حسن: أقول كريم

كريم: ما تخلي الواحد يتغدى عدل يعني.. من سالفة الى سالفة..قول قول أنا اسمع

حسن: بل بل عليك بس خلاص كنسلت ما بقول شي بنطم عشان حضرتك تشبع بطنك لين ما تنبط

كريم: هههههههههههههه يلا قول انا أمزح اياك

حسن: عاد لا تطنز عليي اعرفك انته كل السوالف عندك طنازة

كريم: لالا ما بطنز قول وخلصنا

حسن: انزين.... وش يعني ليك الحب؟؟؟

كريم يتنهد: آآآآه تسألني عن الحب!!

حسن: هاا يا الحبيب شكلك غرقان فيه

كريم: أي والله ..الحب وما أدراك ما الحب..الحب عذاااب تعرف يعني ويش العذااب؟؟

حسن: اعرف اعرف ما يحتاج تعلمني عنه

كريم: الا تعال انته وش الطاري عشان تسأل لا يكون....!!
حسن: هاا أنااا لا مافي شي ولا تقعد تطلع عليي كلام

كريم: أي أي علينا هالكلام ...أنا ما يمشي عليي هالكلام

حسن: والله عاد كيفك مو لازم تصدق

كريم: عجل أنا اليوم لازق فيك لزقة ومانا طالع الا اذا عرفت السالفة كامل

[فاقدة الحنان]

تكملة الجزء التاسع


في بيت حجي مكي
بالتحديد في حجرة زهرة


زهرة: تعالي يا خايبة النمرة ويش مسوية من دواهي ؟؟ وبعدين وش سالفتش من شفتين رفيق أخوش تغير وجهش!!

زينب: مو مسوية شي يعني الحين انتين تشكين فيني

زهرة: لا ما أشك بس الحركة اللي صارت تخلي الواحد يشك غصباً عنه

زينب: لا تخافين لا يروح فكرش بعيد ترى لا أكلمه ولا شي بس صار ليي موقف اياه وهالموقف لا يحسد عليه

زهرة: جيفه وش صاير؟؟

زينب: هذا الله يسلمش داك اليوم رايحة بنادي على أخويي حسن عشان يطالع ايايي الفيلم الهندي ...... وقالت ليها السالفة من طأطأ للسلام عليكم



عند حسن وكريم


كريم: ها وش قررت الحين بتقول او لا

حسن: انته وش فيك وش تبيني أقول

كريم: وآخرتها يعني اياك

حسن بتردد وعلى وجهه علامات الحزن: كريم.. انـ أناا أناا أحب

كريم: يا الملعون تحب ولا تقول ليي بعد.. قول قول غرد من اللي تحبها

حسن: ما بقول اعرفك انته كله تتطنز وبعدين أخاف تفضحني

كريم: افااا أنا أخونك وافضحك عجل يلا مع السلامة

حسن: ههههه تعال وينه بتروح اقعد بسولف اياك

كريم: مو أنا افضح الناس بعد حقويش تقول ليي اسرارك ..ناوي تنفضح

حسن: يلا اقعد بلا مصاخه

كريم: هداني قعدت ...أنته تكلمها؟؟

حسن: مو هني المشكله

كريم: مشكله؟؟ جيه وش مسوي بعد لا تقول ليي صادوها تكلمك وكفخوها

حسن: ما ادري اقوم ادوسك الحين صبر لين ما اخلص وبعدين تكلم

كريم: انزين قووول أذيتنا

حسن: أصلا اللي أحبها انا هي ما تدري يعني ما قلت ليها ولا صارحتها بشي

كريم: تصير ليك؟؟

حسن: لا رفيقة اختي وتصير بيت جيراننا بعد

كريم: هاا لا يكون اللي شفناها من شوي ؟؟

حسن: أي هادي هي

كريم: حسن انته تحبها صدق يعني ناوي تخطبها او تلعب عليها

حسن: كريم أنا عندي أخت وأخاف عليها بعد يعني اللي ما برضاه لأختي ما برضاه على بنات الناس وانا ناوي أخطبها بس مو الحين لين ما تنحل مشكلتي اياها

كريم: وش هالمشكله؟؟

حسن: ما ادري بس من فترة صار بيني وبينها كلام وهي انقهرت مني ومن تصرفي اياها

كريم: انزين قول السالفة عدل عشان افهم

حسن: انزين اسمع.... وقال لكريم السالفة كاامل

عند زينب وزهرة الوضع كان ربشة كلما يتذكرون الموقف اللي صار لزينب قعدووا يضحكون

زينب: ههههههههههههههه بس عاد لا تطنزيين عليي واني وش دراني انه في احد لكن عساش تصيرين في نفس الموقف

زهرة: وي اسم الله عليي ..والله هذا بعد من هبالتش عجل تدخلين المجلس وبس يمكن أحد جاي وانتين ما تدرين يعني

زينب: واني عاد وش دراني من شفت شاروخان افتر راسي

زهرة: محد دابحنش غيره هههههههه


أما عند كريم وحسن الجو كان متكهرب شوي بالنسبة لحسن أما بالنسبة لكريم فكان الوضع عنده عادي كالعادة ما يسكت عن التعليقات

حسن: وانته عاد ما تسكت لازم تتطنز عليي

كريم: لا والله حالتك كاسرة خاطري.. انزين روح اخطبها وفك روحك

حسن: واذا خطبتها ورفضتني وش اسوي انا

كريم: وحقويش ترفضك!!

حسن: انته غبي او تتغيبه أقول ليك هي ما تطيقني ما تحب تشوف رقعة وجهي من اللي سويته فيها داك اليوم

كريم: عاد هادي مشكلتك محد قال ليك تتعلف ابها

حسن يفكر: اسمع وش رايك أكلمها أول واشوف رايها

كريم: هي انته خرفت .. وش ناوي عليه.. هي بروحها ما تحب تشوفك الا بعد تكلمها عشان تتفل في وجهك وتمشي عنك

حسن: خسي انا احد يسوي ليي هالحركة

كريم: عجل توكل على الله وتقدم ليها

حسن: انته جدي رايك يعني

كريم: أي

حسن: يعني ما بترفضني!!

كريم: واني وش دراني بترفضك او لا قالوو ليك قاعد اياها

حسن: انزين اعصابك اعصابك لا ينط ليك عرق الحين

كريم: تدري انا بقوم اروح لولدي تأخرت عليه واجد

حسن: أي تعال انا من متى قايل ليك ابي اشوفه ولا شفته وشكلي بموت ولا بشوفه بعد

كريم: الصراحه انا اخاف على ولدي تحسده وبعدين يمرض او يصير فيه شي

حسن: مدام انته ابوه ما اظن يطلع قمر

كريم: احترم نفسك ها على الاقل احلى منك والبنات يركضون ورايي يتمنون بس نظرة مني بس أنا ما اهتم ليهم

حسن: لا احلف انته بس يلحقون وراه قال

كريم: لا يفوتك بعد يرقموني

حسن مواصل اياه: افاا جان ناديتني يوم رقموك عشان اصورك وانشرك بلوتوث واكتب تحت الصورة الشاب الذي يعاكسونه البنات

كريم: افا عليك مره ثانيه اخليك تصور ولا يخمك

حسن: مخمة اللي ترقص على ضهرك انشاءالله

كريم: بل وش فيك صاير مثل العجايز تدعي عليي

حسن: انته تخلي الشاب شايب

كريم:هههههههههههه اوكي عجل انا الحين اخليك واجد أخرتني يلا مع السلامة

حسن: الله يسلمك.. وسلم على حسين اللي ما بنشوفه

كريم: انشاءالله المره الجاية

[فاقدة الحنان]

حبيت احط لكم القصة جدي لاجزاء وراء بعض
لان خفت تنمعني طورف ادخل النت وماقر انزلها لكم
او
مثلا
في اعضاء يحبون يقروان القصة متتابعة

[فاقدة الحنان]

الجزء العــاشر

في حجرة زهرة


زينب: يلا زهروو اني بمشي الحين .. أي صحي السنه ما بتسافرون

زهرة: ما ادري .. مدام هالعجوز ايانا ما بنسافر

زينب: مسكينه مو زين تسوين فيها جدي

زهرة: لا اني ما اكرهها بس ساعات تصرفاتها تقهرني

زينب: بعد هادي مرة كبيرة وما تفهم لازم انتين تقدرين السن الي هي فيه وتحتريمنها

زهرة: انشاءالله عمتي ..أي أوامر ثانيه

زينب: مالت عليش طول عمرش هبله

زهرة: شكراً آنسة فهووي

زينب: حياش الله كل يوم تعالي يلا الحين امشي وصليني للباب

وطلعت زينب من بيت زهرة وراحت بيتهم عاد أول ما بتدخل البيت جان تجوف في وجهها كريم

زينب في خاطرها: يا علي وش هاليوووم وين ما اروح يطلع في وجهي

كريم في خاطره: الله يا محلا الصدف .... اليوم أحلى يوم في حياتي <<< الرجال رايح فيها

حسن: يلا دخلي داخل

وطلع كريم من بيت حسن وهو مفهي مو داري بالدنيا وزينب اللي تمنت الارض تنشق وتبلعها ولا تشوفه مرة ثانية.. بس هادي الصدف



في بيت حجي مكي
في الصالة


الجدة تساسر فخرية: يلا قومي كلمي بتش له..إلى متى يعني

الأم فخرية: انزين عمتي خليها لباجر احسن

الجدة: لا لا ما اقدر اصبر لباجر بعد قومي قولي ليها لا اقوم اني واقول ليها الحين

الأم فخرية: لا انتين لا تقولين ليها هي ما تتقبل شي منش اني بقول ليها وامري لله

زهرة: انتون وش فيكم تتساسرون..تدرون اني بروح انام احسن ليي..وباجر لا تقعدوني من الصبح بعد خلاص المدرسة وخلصتها

الجدة: يلا قولي ليها بسرعة قبل لا ترووح

الأم فخرية: تعالي زهرة قعدي شوي بكلمش

زهرة: أماااه باجر الحين اني فيني نومه

الأم فخرية : لا حبيبتي قعدي بس بقول ليش كلمتين بسرعه وروحي

زهرة: انتين قلتين بس كلمتين يعني لا تزيدين

الأم فخرية: الحين انتين ...وتوها الأم بتكمل الا زهرة مقاطعتنها في الكلام

زهرة: بس خلاص صارت كلمتين الحين بروح انام

الجدة: قعدي قعد رسش امش بتكلمش

زهرة: اذا السالفة فيها انتين بعد يعني ما تبشر بخير

الأم فخرية: انزين سمعي خليني اكمل كلامي وروحي نامي نامت عليش طوفة

زهرة: لا حلفوو انتون بس وحده تقول ليي قعد رسش ووحده نامت عليش طوفه اني الصراحه ما اقبل بالاهانات لازم ارفع عليكم قضية سب وقذف

الجدة: اهووو قعدي يلا بلا هرار علينا

الأم فخرية: سمعي زهرة فتحي عيونش زين ونظفي اداينش عدل وكبري عقلش بعد

زهرة: جييي وش صاير!!

الأم فخرية: ولد عمش متقدم ليش من زمان وناوي يخطبش وابوش واني وجدتش كلنا موافقين عليه..يعني هو رجال وماعليه قاصر

زهرة مو مستوعبة الكلام: وتبوني أوافق عليه؟؟؟

الجدة: جيي انتين مو موافقة لا يا بويي انتين ما بتحصلين احسن من ولد عمش..هو اللي بيعزش وبيحافظ عليش..هذا من دمش ولحمش
زهرة عصبت: ومو على كيفكم تغصبوني على الزواج..واني بعدي صغيره ما ابي اعررس..خله يدور غيري

الجدة تصارخ: لا عجل على كيفش..المدرسة خلصتينها يعني الحين ما عندش حجة ..وهو من زمان قايل يبيش

زهرة: متى قال يبيني وهو من زمان لا اشوفه ولا يشوفني ويمكن لو الحين يشوفني في الشارع ما يعرفني اني من..مافي احد غيرش ورى هالسالفة كلها

وعلى صراخ الجدة وزهرة حجي مكي كان توه جاي البيت دخل الصالة مثل الأطرش قاعد وسط الزفة ما يدري على ويش يتهاشون

حجي مكي: الحين انا ابي افهم على ويش كل هالصراخ اللي موصل للشارع!!

الجدة: هادي بتك اللي ما عندها لا مذهب ولا دين تبي تمشي رايها علينا

زهرة: شوف ابوي خلاص اني امك خلاص ما اقدر اتحملها ..تبي تعرسني غصب

حجي مكي: ومن قال انش بتعرسين غصب..انتين لازم ليش راي

زهرة: أي واني قلت رايي مو موافقه

الجدة: هادي اللي بترفع ضغطي وبتدبحني الحين..يا بت الناس اقول ليش يبيش تقولين ما تبينه

حجي مكي: انتين انزين ما شفتينه ..شوفيه أول وبعدين حكمي عليه

زهرة : مو لازم اشوفه..واني ما ابي اعرس من الحين بعدي صغيرة وابي اكمل دراستي اول

الجدة: هو ما بيمنعش من دراستش درسي لين ما تموتين

زهرة: والله ما بموت الا منش يا سوسة البلا

حجي مكي: بس خلاص الحين الوقت متأخر عيب علينا الناس يسمعون صراخنا في هالليل ..زهرة انتين روحي نامي الحين وفكري في الموضوع ومن اصبح افلح

زهرة: اني ما بيتغير رايي من الحين لباجر ..ما ابيه يعني ما ابيه تفهمون او لا

الجدة: لا بغاش الله ولا رسوله وش جايفه انتين في ولد ولدي عبالش بتحصلين احسن منه

زهرة ما اهتمت لجدتها ومشت عنها راحت حجرتها ونامت من زود الصراخ


يوم ثاني الصبح


قعدت الجدة من صباح الله خير وتردد نفس الموال ضاربة في راسها تاخد ولد ولدها لزهرة وزهرة مو راضية<<< البنية ما تبيه غصب يعني

الجدة: هادي بتكم واجد تتدلع لكن يا أني يا هيي..هادي جاهلة وما تعرف مصلحتها

الأم فخرية: بعد هي ما تبي تعرس من الحين واحنا ما نبي نغصبها على شي

الجدة: لا عجل تخلون هالجاهلة تمشيكم على هواها

الا بدخلة حجي مكي... وسمع الكلام اللي دار بين الجدة وفخرية

حجي مكي: أماااه وانتين للحين مصره على هالسالفه

الجدة: بتك ما بتاخد غير ولد عمها..محد بيعزها ويرزها غيره

حجي مكي: واحنا ما نبي نغصبها على شي ما تبيه

الجدة: عاد شوفووو اني قلت بتاخده رضت لو انرضت غصبا عنها بتاخده

حجي مكي: بس اماااه...

الجدة: شوف فهم بتك اذا ما خذت ولد عمها لاني أمك ولا انته ولدي

حجي مكي: صلي على النبي امااه

الجدة: اللهم صلِ على محمد وآل محمد

[فاقدة الحنان]

الجزء 11

في الشغل
عند حسن وكريم


حسن: اناا متملل حدييي من هالشغل ابي اطلع منه

كريم: وينه تبي تروح يعني

حسن: ما ادري افكر أقدم على الشرطة

كريم: تقدر عاد على أشغالهم...واجد متعبة

حسن: عجل الى متى اقعد ليك هني على هالمعاش البسيط..على الاقل هناك ازيد...يعني بقدر أمشي أموري وبقدر اتزوج

كريم: انته وش طاري عليك هالايام على سالفة الزواج

حسن: ها بعد لا يكون محتر لأني بعرس

كريم: لا مو محتر ولا شي ..الله يوفقك

حسن: انزين انته مو مفكر تشتغل في شغله غير؟؟

كريم: يلا جان عندك شغله دور ليي

حسن: وش رايك تروح ايايي نقدم على الشرطة

كريم: يصير خير

حسن: انته من تقول يصير خير يعني مستحيل يصير الشي

كريم: انشاءالله بفكر في الموضوع أول وبدرسه من جميع جوانبه وبعدين برد عليك

حسن: اللي يقول الحين انته بتسوي مشرووع كبير

كريم: وانته وش فيك جدي كله مستعجل

حسن: الحين انته بالله عليك عاجبتنك هالشغله أو عاجبنك معاشها!!

كريم: الله كريم

حسن: وبتقعد تحط ايدك على خدك وبتقول الله كريم من وينه بجيك الشغل يعني..بينزل عليك من السماا

كريم: افففففففف انته ويش فيك صاير حنااان ورناان

حسن: الحين يعني خدها بالعقل ..من بتقدر تفتح بيت اذا اعتمدت بس على هالشغله..والله انته مو ناوي تعرس وتستقر

كريم: ومن اللي أهلها بيقبلون بي.. وهالبنية من تدري انه عندي ولد ما بتوافق

حسن: خل إيمانك بالله قوي..وبعدين انته ما فيك عيب عشان ما يوافقون عليك..واذا على ولدك مو كل البنات مثل بعض..بالعكس في بنات ما عندهم مشكله ياخدون واحد عنده ولد

كريم: خلها على الله

حسن: هونها وتهون..ترى الدنيا ما تسوى..وانشاءالله بتحصل بت الحلال اللي تريحك وتتحمل بولدك

كريم: إنشاء الله


في بيت حجي صالح
الساعة 12 الظهر


الأم مليحة: يلا قومي أدن الضهر وانتين منطبنه قومي صلي يا قليلة الصلوات

زينب: اوهووو حتى أيام الأجازة ما ناخد راحتنا في النوم..توني أول يوم أجازة خليني أنام

الأم مليحة: قومي بلا خيابة عليي قومي ساعديني

زينب: افففف جيبي ليش خدامه اني ما احب شغل البيت

الأم مليحة: اني وحده ما احب شغل الخدم...والحين بتقومين لا أتصل لأبوش وأقول ليه عنش

زينب: لا لا لا خلاص الحين بقوم..بس خليني انام خمس دقايق عااد أمااه

الأم مليحة: اني اعرفش تقولين بس خمس دقايق وتسوينها خمس ساعات

زينب: افففففف هداني قمت ... متى يا ربي أعرس عشان أفتك من هالبيت وعوار الراس

الأم مليحة: يا سودة الوجه ما تستحين تقولين هالكلام قدامي

زينب: واني وش قلت.. والله عرس صار حرام بعد هالأيام

الأم مليحة: انتين ما منش فايدة.. يلا بتقومين لا اجيش بالملاس

زينب: بقوم بقوم..دليتينا عاد


في بيت حجي مكي
في حجرة زهرة


الأم فخرية: الحين وش قلتين يا بتي..موافقة لو لا

زهرة: اني قلت ليكم رايي من أمس ..مو موااافقة

الأم فخرية: وحقويش مو موافقة...شايفة في الرجال عيب؟؟

زهرة: لا بس ما ابي اعرس الحين بعدي صغيره..وجم مرة أقول ليكم أبي أكمل دراستي أول

الأم فخرية: انزين هو ما بيمنعش عن الدراسة

زهرة: وانتين وش دراش ما بيمنعني!!

الأم فخرية: لأنه متخرج من أمريكا ويفهم يعني مو متخلف

زهرة: جيي كل واحد متخرج ودارس يعني فاهم..أكوو في ناس مو دارسين ويفهمون أحسن من اللي دارسين

الأم فخرية: انزين انتين شوفيه وبعدين أحكمي عليه

زهرة: ماني ماني ما ابيييييييه

الأم فخرية: وجدتش مو راضية تاخدين غيره

زهرة: لااا جيي هي ولية أمري واني ما ادري..يعني أبوي وينه راح..ماليه كلمه

الأم فخرية:أبووش موافق على الصبي باقي بس موافقتش

زهرة: انزين واني مو موافقه

الأم فخرية: عاد جدتش قالت وافقتين لو ما وافقتين بتاخدينه يعني بتاخدينه

زهرة: مو على كيفي..واذا غصبتوني عليه بقول للشيخ في ليلة الملجة اني مو وافقة وأهلي غاصبيني عليه

الأم فخرية: غربلتيني الله يغربلش...اني مافيني شدتش..خلش تولين بقول ليهم اني ماليي دخل فيها..وخله جدتش وابوش يتصرفون اياش

زهرة: هالسوسة كله منها هيي الا مخططه لكلشي...بتصل لزنبوو عشان تجي ليي قبل لا انتحر

واتصلت زهرة لزينب قبل لا تنتحر على قولتها....تلفوزن زينب يرن..يرن..يرن وما تشيله

زهرة:اففففف هادي بعد وش فيها ما تشيله ..بتصل على بيتهم احسن

واتصلت زهرة على بيت زينب وبعد فترة شالووه
زينب: آلوو

زهرة: جان ما شلتينه..حرقت التلفون من كثر الاتصالات

زينب: جيي وش صاير؟؟

زهرة: ابيش تجين ليي

زينب: هادي السالفة يعني!!

زهرة: ما ادري اطلع ليش من السماعه الحين واهفش بطراق على عيونش

زينب: هي هي اشوف تتعدين عليي واني ساكته عنش هاا

زهرة: يلا قوموي تعالي ليي لا انتحر

زينب: اكيد صاير شي خطير

زهرة: اذا جيتين بتعرفين

زينب: بس الحين أمي ما بترضى تخليني اطلع ..واني قاعده اشتغل اياها

زهرة: يا ربيي وش هالحالة الكسيفه...تدرين اني بجي ليش عجل

زينب: اووكي انتظرش مو تتأخرين

زهرة: انزين يلا قلبي وجهش

وسكرت زهرة التلفون من عند زينب وراحت لأمها عشان تخبرها انها بتطلع ..جان تسمعها الجدة

الجدة: قعدي مكانش مافي هيامة..البنيه ماليها الا قعدة البيت

زهرة: لا حلفي..لا يكون باخد برايش اني..واني بروح بيت الجيران يعني خطوتين ما قلت ليش بروح السيف

الجدة: بلا قلالة حيا وقعدي في بيتش ..وبيت الجيران ولدهم كبير مو عدله يشوفش في بيتهم..وانتين مو جاهله

زهرة: امااه هداني قلت اليش اني بروح لزينب يلا مع السلامه.....ولا اهتمت لجدتها وطلعت من البيت

الجدة تصارخ: فخرووو شفتين بتش طايحة النصبة..صايرة واجد قليلة حيا وما تسمع الكلام

الأم فخرية: عمتي هيي الا بتروح لزينب ما بتروح بيت غريب

الجدة: وانتين بعد تشجعينها..ما توقفينها عند حدها

فخرية ما تبي تطول السالفة وسكتت عنها

في بيت حجي صالح
في حجرة زينب


زينب: بسم الله وش فيش قالبة الوجه علينا

زهرة: سكتي لا ارتكب فيش جريمة ..توني متهاوشه ويه جدتي اللي بتموتني قهر

زينب: وانتين هادي سالفتش بس..كله هواش وياها

زهرة: انتين لو تدرين وش مسويه فيني جان كفختينها بعد مو بس تهاوشتين اياها

زينب: وش مسويه!!

زهرة: سمعي السالفة من البداية بس لا تقولين لأحد..خليها سر بينا

زينب: بل لهدرجة السالفة خطيرة

زهرة: وأكثر بعد



شنو توقعاتكم للأجزاء الجاية!!
تعتقدون زهرة بتوافق على ولد عمها!!
وحسن؟؟
شنو بيصير في القصة من أحداث وتطورات جديدة!!

[فاقدة الحنان]

تكملة الجزء 11

زهرة: تدرين امس عقب ما طلعتين من بيتنا امي قالت تبيني في سالفة..وقالت ليي انه ولد عمي متقدم ليي من زمان..بس هم يحارسوني اخلص مدرسه عشان يفاتحوني بالموضوع

زينب مستانسه وتناقز: حلفييي..الاااي زهرووو بتعرسين الااااي بيصير عندنا عرس

زهرة تقوم و تعطي زينب ضربة على ضهرها: يا الخبلة وش فيش جدي مزهوقة

زينب: آآآآآآآآآآيي عساااش ريح كسرتين ضهري

زهرة: عجل اني منبطه جبدي وانتين مستانسه وتناقزين ليي مثل السبلان
زينب: أحد يحصل ليه رجل ويرفضه...يا الغبيه هالايام ما تحصلين ليش رجل الا بالطفرة

زهرة: واني ما ابيه غصب يعني

زينب: حقويش يعني هو فيه عيب!!

وهرة:اني اصلاً من زمان ما شفته ولا شافني ولو يطوف صوبي الحين لا اعرفه ولا هو يعرفني

زينب: عجل جيفه تقدم ليش!!

زهرة: مو السوسه جدتي مرشحتني لييه

زينب: بل بل قوية..بروحها تتصرف وعلى كيفها بعد

زهرة: عشان تعذريني

زينب: لا الحين عذرتش ياختي..والحين وش صار!!

زهرة: اني مو موافقة..يعني مو رافضتنه..بس اني ما ابي اتزوج الحين

زينب: انزين قولي ليهم ما تبين تعرسين الحين

زهرة: انتين وش فيش غبيه جدي..اقول ليش السوسه تباني اخده غصب..تقول ليي ما بتاخدين غيره

زينب: تدرين اذا ما تبينه طرشيه ليي

زهرة: جاااان زين يصير..جان افتك من هالبلوة

زينب: الحين مو تقولين انتين ما شفتينه من زمان

زهرة: أي

زينب: انزين انتين الحين شوفيه وبعدين احكمي عليه

زهرة: ماني ماني

زينب: عجل خلش تولين بيغصبونش عليه

زهرة: بنتحر

زينب: الحمد لله والشكر مو عاقله انتين..تبين تروحين النار
زهرة: عجل وش اسوي؟؟

زينب: ما ادري خليني افكر

زهرة: فكري ياام الافكار

زينب:أي سكتي عشان اقدر افكر..اني ما اعرف افكر اذا احد يتكلم

زهرة: ويي عشتوو خلاص بسكت

قعدت زينب العبقرية تفكر في خطه جهنمية وزهرة قاعده على اعصابها تبي تتكلم بس زينب مانعتنها...وبعد شوي

زينب بصوت عالي: وصلت وصلت

زهرة نقزت: حسبي الله عليش ..من اللي وصلت

زينب: الخطه

زهرة تتقرب منها: قولي قولي خلف جبدي بسرعه

زينب: أول وين عمولتي!!

زهرة: عمولتش بتحصلينها بس قولي اول

زينب: لا لا اني ما اضمن

زهرة: افف هاش تلفوني ضمان لعمولتش بس فكيني

زينب: أي جدي اووكي

زهرة: قولي عاد دليتيني

زينب: انيتين الحين روحي قولي ليهم انه انتين موافقه عليه

زهرة: لااا تبين تورطيني انتين

زينب: يا الهبله اسمعيني اول

زهرة: يلا بسمعش وبشوفش لوينه توصلين

زينب: انزين في المقابله طفريه بالاسئله وسوي روحش مغروره وقعدي تشطري..واذا قال ليش يمين انتين قولي ليه يسار..فهمتين الحين
زهرة: انتين وينش عنش من زمان يا المخ العبقري

زينب: احم احم اني موجوده بس انتين اللي ما تعترفين بوجودي

زهرة: أي والله ...وتسحب تلفونها من يد زينب بدون ما تحس....يلا مشكورة بروح بيتنا

زينب: العفوو

ويوم طلعت زهرة انتبهت زينب انه التلفون مو عندها

زينب تصارخ: هييي ياالبقرة تعالي قصيتين عليي


راحت زهرة بيتهم وهي تفكر في كلام رفيقتها..وتدور ليها خطط لليوم الموعود..

و زينب راحت الصالة تطالع تلفزيون مع بيتهم...

حجي صالح: هاا بتيي متى بتطلع نتايجكم؟؟

زينب: بل ابوووي تونا امس مخلصين ما مداهم يصححون الاوراق..وبعدين على ويش مستعجل!!

حجي صالح: مستعجل على نتيجتش..ابيها عاد تبيض الوجه مو مثل بعض الناس سودوو وجهي يوم جابوو شهادتهم

حسن طالع ابووه وهو متفشل لأن عرف انه هوو المقصوود

زينب : إنشاءالله ابوويي..بس عاد لازم الهدية توصلني

حجي صالح: اللي تبينه بجيبه ليش

زينب: صدق ابويي!! عجل انشاءالله اطلع الأولى

حسن: هههههههههههههههههههههههههههههههههههههههه تحلمين انتين عفر
هذا اذا طلعتين الاخيرة بعد واجد زين

حجي صالح: على الأقل أحسن منك ..يلا انا بروح انام احسن ليي من هالقعده البطاليه...وانته ما وراك شغل الا قاعد

حسن: بلى عليي الحين بقوم

حجي صالح: عجل تصبحون على خير..ولا تنسون تبندوون الليتات

حسن وزينب: وانته بخير

وراح حجي صالح ينام وظلوو زينب وحسن قاعدين يطالعون التلفزيون
زينب سرحت شوي..انتبه ليها اخوها حسن...

حسن يصارخ في اذونها: بووووووو

زينب تنقز: بسم الله الله يغربلك انشاءالله زهقتني بغيت امووت

حسن: ههههههههههههههه بل بل عليش انتين تموتين..انتين ام سبعة اروااح

زينب: لا تحسدني يا الحسوود

حسن: انزين قولي ليي في ويش كنتين سرحانه؟؟

زينب: ولا شي.. بس كنت افكر في زهرة

حسن: تفكرين في زهرة!!! جي هيي وش فيهاا

زينب: مسكينه كاسره خاطري

حسن: على ويش؟؟

زينب: زهرة متقدم ليها ولد عمها وهي مو موافقه وجدتها الا تبيها تاخده>>>هالبنيه ما تعرف تجود لسانها..الحين السالفة سر يا زعم وتروح تقول لأخوها..صدق هبله

حسن من سمع الكلام وحس كأنه أحد راشنه بماي باارد..ما اقدر يتكلم..وما يعرف شلون يتصرف الحين..خلاص زهرة ضاعت من ايده..ما بيقدر يتقدم ليها الحين

حسن يصارخ: مو على كيفهاااا>>>>مو منه من الصدمة

زينب مستغربة: حسن ويش فيك!!!

حسن ما قدر يستحمل أكثر ومشى عنها..راح حجرته وقفل عليه الباب..ظل طول الليل يفكر بزهرة ويصيح وكلما يتذكر كلام أخته زينب يصيح أكثر>>>مسكين حاله هالعاشق

ومن الصوب الثاني زهرة بعد ما كانت نايمة...لأنها طول الليل قاعده تخطط وتفكر في الكلام اللي بتقوله لأمها الصبح
[/font][/center][/size]

[فاقدة الحنان]

الجزء 13

في بيت حجي مكي
حان الوقت الموعود


العائلة الكريمة قاعدين ويتنتظرون عريس الغفلة ..زهرة متوترة وزينب يا زعم تهديها..الجدة متشققه حدها ..وحجي مكي وفخرية كانو فرحانين لأن بيتهم بتعرس برضاها ..وهذا اللي كانو يبونه عن المشاكل

كسر هالصمت صوت الجرس...زهرة زاد توترها عن قبل..وقبلها يدق مثل الطبوول..تخاف تفشل هالخطة وتورط عمرها..>>>ما حسبت حساب للي جاي...يا خوفي هالنبيه تندم

دخلوو الرجال المجلس والنسوان قعدوو في الصالة..كل وحده تسأل عن أخبار الثانية وضحك وسوالف...بعدين حجي مكي راح ينادي على زهرة عشان تشوف ولد عمها في الصالة الثانية
دخلت زهرة الصالة ..وأول ما دخلت شافت شخص قاعد بهيبته وكشخته ورزته...يمعني بمعنى الكلمة شخص يسحر..أعجبت فيه...سلمت عليه وقعدت في بداية الصالة على الكرسي وهي منزلة راسها>>>تستحي البنيه

علي: شخبارش زهرة؟؟

زهرة مستحية: زينه

علي: وشخبار الإمتحانات اللي طافت؟؟

زهرة: الحمد لله

علي: يعني بتطلعين من المتفوقين؟؟

زهرة: إنشاءالله

علي: أي أنا ابي مرتي تكون شاطرة ودايما تكون من الأوائل

زهرة هني استحت...ما عرفت وين تودي وجهها..تمنت الأرض تنشق وتبلها..ولا تكون مقابلتنه ويسمعها هالكلام>>>هذا وما قال ليها شي وصارت جدي عجل لو يقول ليها من كلام الحب وش يصير فيها..جان الله يستر

علي: وش فيش ساكته جدي..يعني انتين لهدرجة هادئة!!

زهرة: لا بس مو متعودة عليك

علي: انزين ما بتسأليني عن أخباري؟؟

زهرة اتفشلت: مسامحة نسيت..شخبارك؟؟

علي: وهالشي ينسى يعني..انا تمام الحمد لله..زين دامني مقابل الزين

زهرة في خاطرها: ما ادري اقوم افلعه بالقلاس اللي قباله..قاعد ويتغزل فيني بعد..عيني عينك

علي: انزين خلينا ندخل في الموضوع

زهرة تستهبل: أي موضوع؟؟

علي: ليش ما تدرين؟؟

زهرة: وش صاير؟؟

علي في خاطره: هادي تستهبل والا ويش؟؟

علي:عن موضوعنا انا اياش..الخطوبة

زهرة بعدم اهتمام: ايييي عبالي شي ثاني>>>بدت تطبيق الخطة الجهنمية

علي:شي ثاني؟؟مثل شنو؟؟

زهرة: لا ولا شي...

علي: امممم..انزين انا قالوو ليي انش تبين تكملين دراستش

زهرة: طبعا أكييد بكملها ...عجل تبيني أصير متخلفه

علي: أي ما قلنا شي..وانا بعد أبي مرتي تكون متعلمه وفاهمة..وش تفكرين تدرسين في الجامعة

زهرة: أي جامعة؟؟ تقصد مدفنة البحرين؟؟

علي: أي..لو انتين مفكرة تروحين جامعة خاصة؟؟

زهرة: نو نو نو أني ما ابي اروح جامعات في البحرين...البحرين كلها على بعضها فاشلة..أني وحده أفكر أدرس في الخارج..وإنشاءالله بخلي البابا يطرش أوراقي لهم بأسرع وقت

علي: نعم نعم نعم ..تبين تدرسين في الخارج بعد؟

زهرة: أي..عجل حلال عليك وحرام علينا

علي: لا اني ما اقصد جدي..بس تدرين انه خطوبتنا بتصير هالصيف.وأنا شغلي هني في البحرين.شلون أخليش تروحين بروحش بره تدرسين

زهرة: هههههه عادي...اني بروح ادرس ما بروح العب..وبعدين هذا يسمون انفتاح..عجل وين اللي يقولون انك واحد منفتح ومتطور ودارس في امريكا..الحين اللي دارس في أمريكا يكون جدي؟؟

علي: لاا صدق والله ...وتبني أقعد هني وأخليش تروحين هناك بروحش؟؟

زهرة: أي وش المانع!!

علي: اووكيي عجل ملجتنا بخليها اسبوع الجاي وإذا ملجنا بكون انا الوصي عليش..يعني ما تقدرين تسافرين بدون شوري

زهرة: هاهاهاهاها خبرك عتييق....الحين عدلوو القوانين وصرنا مثل أمريكا

علي: هذا عاد في قانوش انتين..وهالكلام ما يمشي عليي>>> بل عصب الرجال..جان ما يصير ضرب البوكس الحين

زهرة:أي وعلى فكرة نسيت أقولك...أني وحده مااادية لأبعد الحدوود...يعني كل صيف لازم أزور على الأقل 10 دول أجنبية..و 6 دول عربية

علي بيموت ضحك عليها: أي بت كانوو وانا ما ادري

زهرة: لا بت حجي مكي

علي: زين بعد عرفتين روحش بت حجي مكي مو بت كانوو..أقول يا الحلوة صورايخش لا تفلتينهم عليي أنا

زهرة انقهرت منه بس حبت تطفشه أزيد: هاهاهاها وش قالو ليك إسرائيل أني

علي: يا ربي عليش انتين من وين طالعه

زهرة: من بطن أمي وااهااا

علي: سخيفة

زهرة: بس مو أسخف منك يا الدب>>> صدق جهال

علي:هادي اللي بتطلعني من طورييي...انا وش ليي اتقدم لوحده جاهله

زهرة: محد جاهل غيرك..واذا اني جاهله على قولتك لا تاخدني

علي: هاااا هذا اللي تبينه انتين..ويوم انش ما تبيني ليش وافقتين عليي عجل

زهرة:اني ما قلت ابيك ولا قلت ما ابيك ... بس قلت بشوفك اول

علي:لا من حقش تشوفيني وتوافقين وترفضين وتطفرين بي

زهرة: أي طبعاً

علي: واثقة من روحش واجد له!!

زهرة تتفلسف: يعني وحده مثلي وش تتوقع تكون..أكيد واثقة من روحي

علي: من حقش

زهرة رافعه خشمها: أدري

علي: أنزين أنا قررت القرار النهائي...تحبين تسمعينه أو لا

زهرة مستناسه في خاطرها: أكيد قرر ما ياخدني

زهرة: أووف كوورس أبي أسمع لأن واجد تهنمي قراراتك

علي: انا قررت بما أني أنا وانتين مو متفقين في شي...وفي كلشي مختلفين..قررت انه من باجر نروح نسوي فحص عشان نبي نسوي الخطوبة في أسرع وقت>>> طااع النذالة

زهرة انصدمت ووقفت: هااا وش قلت!!..أقين اقين ما سمعت

علي: من قال ها سمع

زهرة بتستجن: انته الجين تووك تقول احنا مو متفقين شلون ناخذ بعض؟؟

علي: أي كيفي انتين عاجبتني

زهرة: واني مو موافقة

علي: لا يالحلوة...انتهى وقتش..انتين وافقتين عليي من البداية والكل موافق يعني الحين رفضش ما بيغير شي من الموضوع

زهرة: بس القرار الوحيد يرجع ليي انيي

علي: الحين قرارش صار مو مهم بالنسبة للباقي..ومثل ما قلت ليش من باجر بمر عليش وبنروح نسوي فحص

زهرة: ماني رايحه

علي: مو على كيفش يالحلوة وانا الحين بقول لابووش وخلاص بنحدد كلشي..يلا الحين يالشطوورة روحي نادي على الباباا..يلا عفية عليش

زهرة منقهرة حدها عليه...خاطرها تسدحع في الارض وتطيح في طراقات وبوكسات
طلعت من الصالة وراحت الصالة الثانية وقالت لامها عشان تقول لأبوها..وراحت حجرتها

زهرة: اني وش سويت في روحي..اني غبيه..ما فكرت وش بيصير ليي بعدين...غبيه.غبية ..غبية>>>مسكينه صار اللي ما توقعته

طبعا صار اتفاق بين الجماعه انه على الساعة 9 الصبح يروحون المستشفى عشان الفحص..وزينب من سمعت بالخبر وقفت مكانها مصدوومة...ما تعرف وش تسوي..لكن خلاص صار اللي صار...وحسن من عرف بالخبر انهاار وصار له هبووط وطاح عليهم..نقلوه إلى المستشفى وكان طبعا في العناية لأن حاله ما يبشر بخير...زينب من شافت اللي صار لأخوها في هالفترة شكت انه اخوها يحب زهرة...وهالخبر هو اللي خلاه يوصل الى هالحال...تمنت انه خطوبة زهرة ما تتم


خلاص الحين طاح الفاس في الراس
والخطة ما نجحت
شنو بيصير لحسن .. بينسى اللي صار لو بيظل يتذكره على طول؟؟
وزينب شلون بتقدر تستمر مع حسن

[فاقدة الحنان]

الجزء 14

اليوم الثاني
الساعة 8.30 الصبح


علي كان واقف عند باب بيت عمه يحارس زهرة ومرت عمه عشان يروحون المستشفى..
أول ما ركبا زهرة السيارة شدخت بالباب من القهر

الأم فخرية: حسبي الله عليش من بنية...جدي تشدخين بالباب

علي: ما عليه عمتي كله فداها

زهرة بروحها منقهره منه ومن تصرفاته بعد الحين يقول ليها جدي...سكتت عنه لأن أمها أيامهم وما تبي تسوي مشاكل

لما وصلوو المستشفى راحوو يسوون الفحص..

علي: يلا دخلي انتين أول

زهرة: ماني داخله..أخاف

الام فخرية: يلا دخلي لا تفضحينا..هم ما بيسوون ليش شي...بس بيسحبون منش دم

زهرة: لاا بعدين دمي يخلص..اخااف

علي: صدق جاهله..غمضي عيونش وما بتحسين بشي

زهرة: خله يسحبون دم بس منك

علي: يا ربيي هادي الا بتجننيي شلون ياخدون دم بس منيي..لازم انتين بعد

الأم فخرية: زهروو وش فيش صايرة غبية واجد..يلا امشي بدخل ايااش عورتين راسنا

علي: أي عمتي الله يخليش دخلي اياها..شكلنا اليوم بننقع في المستشفى على حسابها

زهرة: والله عاد محد قال ليك تجي ايانا

علي يقلد عليها: والله عاد محد قال ليك تجي ايانا...يلا يا انسة خلصينا

وبعد حنة وعوار راس دخلت زهرة وسوو لها التحليل وعلي بعد سوو ليه ..خبروهم انه بعد عشرة ايام بتطلع النتيجة...وزهرة تتمنى لو النتيجة تطلع بعد عشر سنوات






في اليوم اللي بعده


زهرة كانت قاعده في حجرتها وتحاتي الشهادة..حبت انها تفكر في أي شي ثاني عشان يروح عنها التوتر
جت على بالها المواقف اللي صارت مع حسن اخو زينب وشلون كان يحب يعاندها..ودايما يحاول يقهرها بأي طريقة..وفجأة جا على بالها علي ولد عمها..والموقف اللي حطت نفسها فيه وهو ظل معاند ...شافت انه في تقارب بين اسلوب الاثنين...
شالت من بالها كل هالافكار وتذكرت صديقتها زينب اللي ما سمعت صوتها من يومين..ولا تدري باخبارها..بسرعة شالت تلفونها واتصلت لها..
ظلت تحاول تتصل مرات ومرات..ولكن لا يمكن الاتصال حاليا بالرقم الذي طلبته>>>أكره عبارة عندي هالعبارة
اتصلت على بيتهم وبعد محد يشيله..
زهرة في خاطرها:معقولة مسافرين؟؟ لا لا ما اظن حتى لو بيسافرون بيقولون لينا..يمكن راحوا بيت اهلهم؟؟ بس الحين يومين لا حس ولا خبر..لا يكون فيهم شي..أعوذ بالله من الشيطان الرجيم
راحت تركض لأمها عشان تسألها عن بيت زينب
زهرة: اماااه أماااه

الأم فخرية: ويش فيش تصارخين كأنش بقرة

زهرة: ما عليه بطوفها ليش هالمرة لاني مستعجلة

الأم فخرية: وش وراش مستعجلة؟؟

زهرة: بيت زينب ويش فيهم؟؟

الأم فخرية: يا علي ابن ابي طالب..ويش فيهم بعد؟؟

زهرة: ويش فيش بتسوينها ليي مناحة؟؟اني الحين اسالش!!

الأم فخرية: ما فيهم شي جيه وش صاير؟؟

زهرة: الحين صار لينا يومين لا شفناهم ولا سمعنا ليهم حس..ما ادري وش عندهم

الأم فخرية: أي صدق..روحي اتصلي ليهم بنشوف وش اخبارهم

زهرة: اتصلت محد يرد

الأم فخرية: يوو ويش صاير فيهم عجل؟؟

زهرة: وش دراني..انتين ناسية بيت جيرانش وتفكرين بس في هالمعرس الفاشل

الأم فخرية: استحي على وجهش..وانتين اللي وافقتين عليه..احنا ما غصبناش

زهرة: أي هذا كله من غباءي..اني اروح بيت زينب اشوف وش صاير عندهم احسن ليي

الأم فخرية: يا الغبية تقولين محد يرد..يعني مافي احد في بيتهم

زهرة: ما عليه بحارسهم عند الباب لين ما يجون..ابي اشوف وش صاير فيهم

الأم فخرية: انشاءالله تصيدش ضربة شمس من القعدة بره يا الهبلة

زهرة: ما عليش مني انتين..احسن بعد جان افتك

الأم فخرية: دلاعتش..تفتكين من ويش؟؟

زهرة: ولا شي..

وطلعت زهرة عنها ..راحت حجرتها تلبس عبايتها وشيلتها..وبعدين طارت على بيت جيرانهم..وهي رايحة صوب بيتهم..كانت في سيارتهم جاية..راحت زهرة صوبهم

زهرة: السلام عليكم ..شخباركم .؟؟

زينب ومليحة وحجي صالح: وعليكم السلام ورحمة الله..وسكتوو

زهرة: ويش فيكم جدي أشكالكم؟؟

زينب حضنت زهرة وقعدت تصيح

زهرة مصدومة: زينب..ويش فيش؟؟ قولوو ليي وش صاير؟؟

زينب بصوت متقطع:حـسـ.. ـــن مريض حده

زهرة قلبها وقف: ويش فيه حسن؟؟>>>ما ادري هذا يسمونه خوف لمجرد الأخوة أو شي ثاني!!!

مليحة ما قدرت تتحمل أكثر وقعدت تصيح ويه بتها..وحجي صالح يهديهم..وزهرة للحين منصدمة مو عارفه وش صاير بالضبط!!

حجي صالح:صلووا على النبي يا جماعة واستهدوا بالله..دخلووا داخل لا تقلبون الشارع لينا ماتم

دخلوا داخل البيت وزهرة مجودة قلبها

زهرة: الحين بتقولون ليي وش فيه حسن او لا؟؟
زينب: حسن في العناية وتعبان واجد

زهرة ظلت حاضنة زينب وتصيح ومليحة من شافتنهم يصيحون زادت في الصياح..وحجي صالح ما قدر يجود روحه ..وراح حجرته قبل لا يضعف قدامهم..

زهرة: انزين هو وش فيه بالضبط؟؟

زينب: ما ادري ما شفناه الا طايح علينا

زهرة: يعني من قبل مافيه شي؟؟

زينب: هو اصلا من سمع انش ....وسكتت قبل لا يزل لسانها

زهرة: كملي وش فيش سكتين!!

زينب: لا ولاشي بس هو قام ما ياكل..ما ادري وش فيه وطاح علينا فجأة

زهرة: لا مو جدي السالفة اصلا..انتين قاعده تجدبين عليي..وحسن اكيد فيه شي

زينب:يعني انتين حقويش مهتمة هالكثر

زهرة: هاا بس جدي اسأل..انزين اني الحين بقوم اروح بيتنا..

زينب: لا قعدي ايايي..والله عريس الغفلة ما يرضى بعد

زهرة: يخسي الا هو وش عليي منه ..وبعدين لا تقولين هذا رجلي لاني ما اطيقه خير شر

زينب: عجل حقويش موافقة عليه

زهرة: غصبا عني..وانتين تدرين بعدين وش بيصير لو ما وافقت..واني ما ابي تصير مشاكل بين الاهل واكون اني السبب فيها

زينب: اوو يا المضحية ..يعني نسمي هذا تضحية عشان تنقذين العائلة من الشتات..يا سبحان الله..صايرة قصتش مثل المسلسلات

زهرة: احسش تطنزين عليي..حقويش تقولين ليي هالكلام

زينب وصلت حدها وبطت الجربة: لان لو ما وافقتين على ولد عمش جان الحين اخوي ما طاح في المستشفى جدي

زهرة مصدومة من كلام زينب: انتين وش قاعدة تخربطين

زينب: أي انتين السبب..انتين اللي مرضتينه..كل منش انتين وولد عمش
زهرة تصيح:زينب اني ماليي ذنب..حقويش فاعده تتهميني بأشياء اني ماللي دخل فيها

زينب معصبة: اخويي يحبش وانتين مو مهتمة..انتين ما تفهمين

زهرة فتحت عيونها على الاخر مصدومة من الكلام اللي تسمعه من زينب:زينب انتين اليوم اكيد فيش شي

زينب: لا مافيني شي..صاحية واحسن منش بعد..زهرة بسألش سؤال

زهرة: قولي

زينب: لو الحين أخوي يتقدم ليش بتوافقين عليه؟؟

زهرة:اخوش الحين مرقد وانتين وش فيش قاعده تخربطين في الحجي

زينب: اني سالتش وابي جواب

زهرة بحزن: الضاهر نسيتين اني مخطوبة لولد عمي..وننتظر الفحص يطلع

زينب: لا تقعدين تلفين وتدورين ..قولي ما تحبين اخويي وخلاص..

زهرة عطت زينب سطار من حرتها: وش هالكلام اللي تقولينه..وش احبه وما احبه..انتين غبيه لو مرض اخوش مأثر عليش

سطار زهرة لزينب خلى زينب تصحى من اللي هي فيه..خلاها تنتبه للكلام اللي قاعده تقوله

زينب: زهرة سامحيني اني اسفة والله ما كان قصدي اسوي فيش جدي..بس غصبا عني

زهرة ما عطتها وجه وطلعت عنها..وظلت زينب تناديها وهي تصيح..بس زهرة طلعت من بيت زينب وراسها يفتر من الكلام اللي سمعته..دخلت بيتهم وعلى طول ركبت فوق

الأم فخرية: تعالي زهروو قولي ليي وش صاير في بيت حجي صالح

زهرة ماليها خلق احد .. راحت حجرتها ولا كلمت احد

الأم فخرية: يوو ويش فيها دي بعد..راحت بيت حجي صالح ورجعت لينا صمخة وغتمة

الجدة: ويش فيش فخروو تهدرين بروحش!!

الأم فخرية: هادي زهروو اكلمها وتمشي عني المفهية ولا تدري بالدنيا

الجدة: هههههه مو منها يمكن تفكر في رجلها>>>هو ما صار شي وتسميه رجلها..صدق عجايز

الأم فخرية: أي رجل يا حظي!! ..هادي مو مالت حب ورومانسية..دي مالت شدخ ومشادخ

الجدة: ومن ويش ما تفكر في رجلها..خلي البنيه على راحتها>>>هالجدة على نياتها..والله زهرة في وين وهي في وين..


المهم مر اسبوع وحسن الحمد لله تحسنت حالته عن قبل ورخصوه..والليله طبعا بينزلون نتايج الثانوية على النت..وزهرة وزينب متوترين حدهم..خايفين ما يجيبون علامات زينة..وما ننسى بعد باجر بيطلعون نتايج الفحص مال زهرة وعلي...


على الساعة 9.30 الليل زهرة كانت قاعده على النت فاتحه موقع الوزارة تحارس النتايج وتكلم زينب على المسنجر..

زينب: زهروو الحين وش صار للحين ما نزلوهم يعني؟؟

زهرة: اكو اني فاتحة الموقع ما اشوف شي للحين ما نزلوو شي

زينب: طاح حظهم..اني صاير بطيء عندي

زهرة: أي لأن قاعدين ينزلونهم الحين وصاير ضغط على الموقع

زينب: اذا نزلوهم طلعي نتيجتي عجل..لان شكله ولا بيفتح عندي اذا على هالحالة

زهرة: اووكي..لحظة اكو واصلني مسج بشوف من اللي مطرش؟؟

زينب: شوفي يمكن وحده من الربع

زهرة: ويييييييع وييع لحقي

زينب: ها وش صاير؟؟

زهرة: هذا عليوو مطرش ليي مسج يسألني عن النتيجة طلعت لو لا..يسوي روحه مهتم بعد مالت عليه

زينب: مسكين حقويش تقولين عنه جدي يحبش

زهرة: لا والله حبه برص..وهو وش يدخله يطرش ليي مسج..ما ادري من اللي عاطنه رقمي

زينب: جي انتين ما عندش رقمه؟؟

زهرة: ويه وش اسوي في رقمة احطه في تلفوني جان ينفجر تلفوني
زينب: ههههه حسبي الله على بليسش..هذا بيصير رجلش قريب

زهرة: لا تذكريني بالهم..تدرين باجر بتطلع نتايج الفحص بعد

زينب: حلفي

زهرة: والله..توه اليوم أبويي قايل ليي..باجر هذا اللي ما يتسمى بيروح من الصبح المستشفى بس عشان النتيجة..صدق منزهق..والله لو اني منه انام ولا اروح

زينب: هو لان يحبش ويهمه هالامر بس انتين غير..وصدقيني هو طيب ومافيه شي..ومع الايام بتتعودين عليه

زهرة: ها الا اشوف غيرتين رايش..مو من قبل ما تبيني اخده

زينب: بعد هذا نصيبش

زهرة: اتمنى هالزواج ما يتم

زينب: مو زين تقولين جدي..الله كاتب انكم تكونون من نصيب بعض

زهرة: زنبوو سكتي اكو نزلو النتايج..ويلي بطني يعورني

زينب: صدق..يلا يلا شوفي اني وش جبت..للحين ما فتح عندي بصيح

زهرة كتبت رقمها وطلعت لها النتيجة..وكـــانت...93.4 ...زهرة تشققت على عمرها..من الفرحة طاحت من على الكرسي..وزينب مزلزتنها من اشارات التنبيه في المسنجر

زينب: يالعله ما تقولين وش جبت؟؟

زهرة: هههه حارسي اول باركي ليي ماني مصدقة هههههههه

زينب: ويش بشري؟؟

زهرة: جبت 93.4

زينب: مبروك مبروك مبروك منش المال ومنه العيال

زهرة: وش فيش خرفتين..لا يكون معرسه اني ههههه

زينب: وش دراني بروحي احاتي نتيجتي..روحي شوفي

زهرة: اكو الحين بيطلع

زينب: يلا بسرعه قبل لا امووت

زهرة: بيييه زنبوو وش هالعلامة!! زفت حدها

زينب شوي وبتصيح: ويش جايبة..قولي طيحتين قلبي في بطني

زهرة: لا ما بقول اخاف تموتين من الصدمة

زينب: لاااا بصيح قولي عاد

زهرة: ههههه يا السبالة اشطر مني بعد جايبة 95.1

زينب فاتحة عيونها: هااا وش تقولين..انتين متأكده هالدرجة ليي اني مو لغيري..يمكن غلطانة ومدخلة رقم وحده ثانية بالغلط..حلفي اول عشان اصدقش>>> صدق هبله..لكن مو منها من الزهقة

زهرة: هههههه والله العظيم وش فيش يا الهبلة ..مبروك مبروك..نبي كوارتين حلاوة عاد

زينب: لحظه انتين خليني اول استوعب اللي قاعد يصير

زهرة: هههههههه ويلي ما اقدر جان زين اني الحين اياش جان اسطرش عشان تستوعيبين

زينب: ههههه لا خلاص استوعبت..وقعدت تصارخ الهبلة من فرحتها

سمع حسن صراخها قام راح يشوفها

حسن: وش فيش مستجنه قاعدة تصارخين..حتى اللي اخر فريق اكيد سمعوا صراخش

زينب: مو مصدقة مو مصدقة..اني جبت 95.1

حسن: حلفي!!

زينب: والله والله مو مصدقة...وقعدت تناقز على سريرها واخوها المستجن يناقز اياها ويصارخ>>> صدق مخابيل

سمعت صوتهم أمهم وجت تشوف وش السالفة

الأم مليحة: يا المقاريد قاعدين تناقزون مفل السبلان..الحين ابوكم بيجي يعدمكم

حسن: أماااه لحقيي..بتش الدكتورة نجحت وجابت 95.1

الأم مليجة متشققة: صدق!!

زينب: ايي امااه يلا ابي هديه

حسن يضربها على راسها: صدق مصفعة..الحين المفروض انتين اللي تجيبين لينا حلاوة النجاح

الام فخرية: هيي انته اقعد عن بتي لا تضربها

زينب: ايوه ايوه عاشت امي المدافعه

حسن: ويي مالت عليش..روحي روحي دلوعة الماما...لكن شوفي اللي يجيب ليش الهدية

زينب: عاد انته يا الزطي تجيب شي..اسكت اسكت احسن لا تفشلنا

الأم فخرية: هي انتون قعدوا عاقلين بلا هواش..اني بروح ابشر ابوش

زينب: أي امااه روحي بشريه ولا تنسين الهدية

حسن يقلد عليها : أي امااه روحي بشريه ولا تنسين الهدية..الحين منهو اللي مصفع انا لو انتين..قاعده وتطرين هدايا واهاهاها

زينب: هي هي هي هي بااايخ حدك

حسن: اقول زينب

زينب : هاا

حسن: وهاون يدق راسش دق

زينب: لو سمحت اطلع برى خلني احتفل بمناسبة نجاحي ويه زهرة على المسنجر بروحنا

حسن: الله يكملش بعقلش انتين ورفيقتش

زينب: ويي من الحره

حسن: انزين صدق ما قلتين ليي زهرة جم جابت؟؟

زينب: وااي؟؟

حسن: مجرد سؤال

زينب: ممكن أعرف وش سر هالإهتمام

حسن: قلت ليش سؤال وبس..لا تطولين السالفة وهي قصيرة
زينب: اهااا

حسن: وش اهااا قولي جم جابت لا تقهريني

زينب: يعني مصر انك تعرف!!

حسن: ما ادري اهفش الحين بكف اخليش تنسين جم نسبتش

زينب: انزين لوعت جبدي عااد ..جابت 93.4

حسن: ايوه على الشاطرة..عاشت

زينب: ويي الحمد لله والشكر..وش فيك..ما اشوف اني قلت ليي شاطرة وعاشت

حسن يبحلس عليها: هي غير

زينب: ايواا ايواا ..عاش الحب

حسن: عساش الموت سكتي لا تفضحينا

زينب: هاهاهاها اقول يا الحبيب..لا تنسى البنية مخطوبة لولد عمها

حسن نزل راسه: أدري...وطلع عنها

[فاقدة الحنان]

الجزء 15

في اليوم الثاني
في الشغل


كريم: وش فيك حسن..تعبان؟؟

حسن: لا بس راسي يعورني..

كريم: جان ما جيت يوم تحس روحك تعبان

حسن: انته وش فيك اقول ليك راسي يعورني

كريم: انزين اعصابك اعصابك اخووي لا تموت علينا

حسن: شوف انا ترى موصل حدي

كريم: أي وبتحط حرتك فيني انا.. شايفني الطوفة الهبيطة انا

حسن شدخ بالكرسي وطلع عنه معصب حده...يفكر في زهرة اللي بتروح من ايده وهو ما بيده حيله>>> لا تنسى يا حسن هذا اللي الله كاتبه لكل واحد... يعني مو نصيبك هالبنيه

كريم من شاف حسن معصب جدي لحق وراه ...ووصلوا عند السيارة

حسن: حقويش لاحقني؟؟

كريم: لا عجل ما تشوف روحك ...تبيني اخليك جدي وبعدين تسوق بسرعه ويصير فيك شي

حسن: جاااان زين ادعم وامووت عشان افتك من هالدنيا

كريم عصب: انته مجنون..مو صاحي تبي تقتل روحك على حساب بنيه..لين راحت هي في بنات واجد غيرها مثلها واحسن بعد

حسن بصوت مبحوح: لااا زهرة مافي مثلها..انته تدري وش هي بالنسبة ليي..صدق انه اناا ما صارحتها بالهشي من قبل..وكنت كله اعاندها بس انا في داخلي احبها..زهرة هي روحي..ولين راحت روحك عنك يعني وش بيصير..اكيييد بتمووت

كريم كاسر خاطره حسن ومو عارف وش يسوي ليه..او وش اللي يرضيه

كريم: حسن انته انسان عاقل وتفهم يعني لين زهرة ما صارت من نصيبك هادي ما يعني نهاية الحياة..بيجي يوم وبتشوف غيرها وبتتزوجها بعد..وبتنسى اللي صار..وبتقول هاده كله طيش شباب..وانا بذكرك بعد

حسن والدمعه في عيونه: هالكلام اللي قاعد تقوله يا كريم مستحيل يصير

كريم: لا تقول مستحيل..لأن مافي شي مستحيل..بإرادتك واصرارك بتقدر تسوي كل شي

حسن يصارخ: واللي يحب صدق تعتقد بينسى هالحب اللي رااااح

كريم: يا حسن الله كريم..((عسى أن تكرهوا شيئاً وهو خيراً لكم))

حسن: والنعم بالله..بس محد يحس بللي في داخلي..محد يحس بللي قاعد اعانيه

كريم: من قال ليك احنا ما نحس..وانا اول واحد أحس فيك

حسن: بس مو مثل اللي احسه..لأنك ما صار لك اللي صار ليي

كريم نزل راسه والدموع متجمعه في عيونه: تقول ليي أنا اللي ما صار ليي مثلك..أنا يا حسن صار ليي اكثر منك..انا اللي حبيت وتزوجت اللي احبها ..لكن الله خداها..وما اعترضت على حكمة ربي...الحين انته اللي ما بينك وبينها كلام ولا شي بتعترض على حكم الله

حسن متلوم: كريم انا ما كان قصدي..بس انفعلت وقلت جدي..والله مو قصدي

كريم: عشان تعرف انه مو بس انته اللي عندك احساس..كلنا عندنا احساس..وكلنا مرينا بتجارب وظروف..بس سلمنا امرنا لله..وما اعترضنا على شي..يا حسن هادي هي الحياة..والله ياخد ويعطي... وخل إيمانك بالله قوي..ولا تخلي هالأمور البسيطة تغير منك..


حسن اقتنع شوي بكلام كريم: الحمد لله على كل حال..يلا قوم خلنا نرجع شغلنا..الحين يروح طايح الحظ وما يشوفنا يخصم منا معاش يومين

كريم: يلا قوم بسرعه ركييض..ما فينا شده يقص من معاشنا



على الساعة 11
في الفريق


زينب وزهرة توهم جايين من مدرستهم.. ماخدين شهاداتهم

زينب: يا عليي واخيرا تخرجنا

زهرة: بس لا تستانسين واجد..بعد باقي عليش تروحين المقصفة ووتخرجين منها..وتقعدين في بيتكم 10 سنين لين ما يوظفونش...عاد بتعرسين وبتصفين ليش درزن جهال وبعدين بيجيش الفرج
زينب: وي اسم الله عليي..والله اني بت حجي صالح بيشغلوني قبل لا اتخرج

زهرة: لا بت الوزير واني ما ادري..اكو قلتينها بت حجي صالح..يعني حالش حالنا

زينب: انزين سكتي وامشي ندخل... عورني راسي من الشمس

زهرة: امشي تعالي بيتنا تغدي ايايي

زينب: لا وحقويش ما تجيبن انتين بيتنا تتغدين..او غدانا ما يعجبش

زهرة: لا والله يعجبني.. بس جدي قلت ليش تجين بيتنا يعني وش صار لين انتين جيتين

زينب: اخر مره اني اللي جيت ليش..يعني هالمره انتين اللي تجين ليي

زهرة: يا عليي حافظة ولا تنسى

زينب: عجل مخش القوطي..

زهرة: عداال يا ام مخ..امشي بروح بيتنا اول وبقول لامي وبعدين بنروح بيتكم

زينب: اوووكي

ودخلوا ثنتينهم البيت وهم يضحكوون

الجدة: هدووويش..حقويش تضحكون هالنمونة..ما يجوز يا بناتي..انتون بنات وما يجوز يسمعون اصواتكم الرجال

زهرة تكلم زينب في اذونها: اففف الحين وش يفكنا منها..فتحنا لينا باب..وش ليش قايله ليي النكتة الحين

زينب: واني وش دراني انا هي عند الباب!!

الجدة: وانتين يا زهرة متى بتتعدلين..ما باقي شي وتنخطبين..وللحين اشوفش مثلات الجهال

زهرة: افففف اففف افف كل ما سويت شي قالو ليي بتنخطبين..لو ادري ما وافقت لوعتون جبدي بهالخطوبة

الجدة: بس انجبي انجبي..قال ليي ولد عمش اليوم بتطلع النتايج مال الفحص..للحين ما رد عليش خبر؟؟

زهرة بملل: لااا ما رد عليي ولا شي..ايي صدق تعالي..من اللي سمح ليكم تعطونه رقمي؟؟

الجدة: اني قلت لابوش يعطيه رقمش..عشان يقدر يكلمش ويتفق ايااش على كل شي
زهرة : لا صدق حلفي عااد ..وش قالت يتفق ايااي.. مو انتين تقولين ما يجوز وحده تكلم واحد غريب الا اذا عقدووا عليهم

الجدة: يا الخروفة هذا ولد عمش

زهرة: ولد عمي لو ولد خالي.. ما يجوز يعني ما يجوز.. لو بتقعدين تحللين وتحرمين على كيفش

الجدة: روحي يا الهبله..لو اقعد افهم فيش من الحين لباجر ما بتفهمين

الأم فخرية: هذا ويش صااير حالة وعفسة عندكم!!

زهرة: تعالي شوفي عمتش المحترمة وش مسويه..عاطيه رقمي الى ولد ولدها

الأم فخرية: انزين وش صار هذا الا خطيبش

زهرة: حلفي انتين بعد..كل وحده قالت خطيبش وخطيبش..للحين ما صار شي وسمووه خطيبي..

الأم فخرية: اني لا اعور راسي ايااش ولا شي خلش تولين

زهرة: اني بعد لا اعور راسي اياكم ولا شي..وبروح بيت زينب احسن ليي من هراركم

الجدة: اول اخدي شور ولد عمش..واذا وافق بعدين روحي

زهرة: لاا .. أشوف وجهش..اخد رايه بعد..والله عاد للحين ما صار رجلي عشان اخد شوره..الشور للحين عند ابوويي..والحين بروح اتصل لابووي وبقول ليه وادري بيوافق

واتصلت زهرة لابوها وخبرته ووافق...

زهرة: شفتيين شفتيين وافق ابووي..يلا خدااافس

الجدة: تعالي يا طايحة الحظ..قولي لولد عمش

زهرة: قولي ليه انتين..اني طالعه

وطلعت زهرة وزينب وراحوو بيت زينب

زهرة: السلام عليكم.. شخباركم؟؟

الأم مليحة وحجي صالح: عليكم السلام الحمد لله حياش الله

حجي صالح: حياش بتي تفضلي..شخبارش وشخبار الشهادة؟؟
زهرة: الحمد لله عمي كل شي تمام

حجي صالح: زين بناتي الله يوفقكم

الأم مليحة: زهرة وش صار على خطوبتش الحين؟؟ طلع الفحص لو بعده؟؟

زهرة مستحية: اليوم بيطلع الفحص

حجي صالح: يعني انتين لازم تحرجين البنيه

زينب: هههههههههههههههههه ه هههههههههههه ويلي بطني عورني من الضحك..زهرة من متى تستحين جدي.؟؟ خخخخخخ

زهرة تفلص زينب وتدوس على رجولها

زينب تعص على اسنانها: آآآآآي يا الدبة ..حارسي ليي لكن اذا رحنا الحجرة اراويش شغلش

الأم مليحة: انزين روحوو بدلووا ثيابكم وتعالوو ساعدوني

زهرة وزينب: انشاءالله

راحوو زينب وزهرة الحجرة>>>زهروو الحين زنبوو بتروايش الشغل العدل

زينب: تعالي يا البقرة بدوس في جبدش..عورتيني

زهرة: لالا بس اخر مرة تووبة تووبة

وزينب طايحة ضرب وتعضض في زهرة

زهرة: آآآآي بس بس خلااص آسفة اخر مرة يا الدبة

زينب: اول تحبين ايدي عشان اغفر ليش

زهرة: احلمي عاد لو تتدحنين صوبي ما احب ايدش

زينب: يلاا بسرعه لا ازيدش

زهرة: لا لا بس بحب راسش مو ايدش

زينب: أي واجد زين.. يلا قومي

زهرة تسوي روحها بتحب راس زينب..وتحط ايدها على راس زينب وتحب ايدها

زينب: يلا حبي راسي

زهرة: حبيت راسش يا الهبله انتين ما تحسين

زينب: انزين قومي نروح لامي

زهرة: ههههههه انزين قومي

زينب: وش فيش تضحكين؟

زهرة: لا مافيني شي هههه

زينب: ولا على الجنون حرج..امشي امشي بس

ونزلوو ثنتينهم المطبخ يساعدون مليحة...وعلى الساعة 2 حسن وصل البيت
دخل المطبخ..وهو مفجووع على الغدى..فما انتبه لوجود زهرة

حسن: أمااااه الحقيني بالغدى جوووع جووع

الأم مليحة: وش فيك جدي مفجوع..الناس تسلم أول

حسن: امااه اقول ليش جوعان..كاه من طايح الحظ ما عطانا بريك اليوم>>>معاقبنهم على يوم ينزلون تحت عند السيارة

زينب: هههههههههههه تستاهلوون عساكم ازيد

حسن يطالع اخته: يا البقرة انا الحين مو فاضي ليش...وقبل لا يكمل كلامه انتبه لوجود زهرة وسكت..ظل يطالع وهو مفهي ..مو مصدق..يغمض عيونه ويرد يفتحها يبي يتأكد
وزينب تغمز له بعينها وتأشر على زهرة...زهرة فهمت الحركة

[فاقدة الحنان]

الجزء 16

طلع حسن من المطبخ وهو مو عارف وين يروح..يمين لو يسار>>>مسكين دار راسه الصبي

راح حجرته ونسى الجوع ونسى الغدى بعد من شاف زهرة

الأم مليحة: زينب قومي حطي الغدى في الصالة حق أبوش وأخوش..واحنا بنتغدى هني في المطبخ

زينب: انزين

وراحت زينب حطت الغدى..وراحت تنادي على حسن

زينب تطق الباب: حسن حسن قوم اتغدى

وحسن ما يرد

زينب تضرب على الباب بقوة: حساانوو قووم الغدى

حسن فتح الباب بقوة: قولي اسمي عدل لا اشدخش بالضرب الحين

زينب: مالت عليك يا العاشق الولهان..من شاف سندريلا اعتفس وما عرف وينه يروح هههه

حسن: يا الغبية البينه بتنخطب..يعني جيفه افكر فيها

زينب: ايي صح ..شاطر حفظت الدرس يعني

حسن سكت عنها ومشى

نزلت زينب المطبخ وقعدووا يتغدوون وبعد ما خلصووا غدى راحت زينب وزهرة الحجرة عشان يرتاحون يا زعم

زهرة تطالع تلفونها: بـــــل انعل.. 15 مس كوول من علي..شكله طلعت النتيجة..

زينب بحزن: يعني خلااص كل شي بيصير

زهرة: عاااادي مع الأيام بتعود

زينب: وانتين كل شي خلتنه على الأيام..المفروض تكونين مقتنعه بالشي اللي تسوينه

زهرة: الا هالشي..حتى لو ما اقتعنت فيه بيصير غصبا عني..ومثل ما شفتين اني سويت هالشي بس عشان جدتي

زينب: يعني انتين تحبين جدتش؟؟

زهرة: اكيد احبها .. مو تشفويني كله اتهاوش اياها يعني ما احبها..بالعكس معزتها من معزة امي..بس اني تعودت على الهواش اياها..نسوي لينا برنامج هههه

زينب: انزين ما بتتصلين اليه تشوفين وش النتيجة!!

زهرة: ما يحتاج اتصل...مدام في 15 مس كوول يعني خلاص كلشي بيصير

وسكتوو 5 دقايق الا تلفون زهرة يرن..وطبعا علي المتصل

زهرة تطالع التلفون وزينب تطالع زهرة

زينب: ما تردين..يلا ردي

زهرة: لحظه شوي

زينب: وش تحارسين لين ما ينقطع يعني

زهرة: لحظه خليني ارتب افكاري..وشالته

زهرة: ألـــو نعم..

علي : السلام عليكم

زهرة: عليكم السلام

علي: شخبارش زهرة؟؟

زهرة: الحمد لله زينه..وانته شخبارك؟؟

علي: اناا ..الله يعلم بحالي

زهرة:ليش؟؟

علي: زهرة بقول ليش خبر هو بيفرحش..بس انا هالخبر ما يفرحني

زهرة مستغربة من طريقة كلام علي: وش الخبر؟؟

علي: زهرة مسامحة على كل شي بدر مني أو كل خطأ ارتكبته في حقش..وانا ادري انه انتين اصلا مو موافقه عليي من رضا ..ترى حتى انا ما كنت موافق عليش اول ما كلموني في الموضوع..بس عشان جدتي وافقت..وعشان ما تصير مشاكل بينا..بس لما شفتش اقتنعت..الصراحة عجبتيني..احس روحش للحين طفولية..وحرام تضيعين مستقبلش من الحين عشان الزواج..يعني للحين صغيرة على الزواج والمسئولية..كملي دراستش الجامعيه وبعدين فكري في هالشي..وانا الصراحة اعتبرش مثل اختي

زهرة: انزين اني مو قاعده افهم وش تقصد بهالكلام؟؟

علي: زهرة انتين تدرين انه اليوم النتايج طلعت

زهرة: أي ادري

علي: أي بس النتيجة كانت سلبية..يعني ما يصلح نتزوج

زهرة من الصدمة قامت تصيح...وزينب ما تبي تعرف وش السالفة..خدت التلفون من عندها وكلمت علي

زينب: الوو أخوي وش صاير ...زهرة قاعده تصيح
علي: لا اختي كل خير..بس النتيجة طلعت سلبية..وهالشي المفروض يفرحها

زينب: اهااا..الله يوفقك اخوي ..ويعطيك اللي تقدرك

علي: مشكورة أختي..سلمي على زهرة..وقولي ليها هذا الشي ما بيغير من علاقتنا كأخوان وولاد عم..

زينب: اوكي اخوي مع السلامة

وقعدت زينب تهدي في زهرة..وتفهمها الوضع..سكتت زهرة..وما شافتها زينب الا تناقز وتضحك

زينب: يوو رفيقتي استجنت..توش تصيحين..وش صار فيش؟؟

زهرة: الااااي يعني ما باخده الاااي

زينب استجنت: الاااي يعني ما بتخليني بروحي الاااي

وقعدوا ثنتينهم يصارخون ويناقزون..حسن سمع أصواتهم..راح يشوف وش السالفة

حسن يطق الباب: زينب..زينب.. وش صاير عندكم؟؟

زينب تفتح الباب: حسن خلف جبدي اخووي زهروو خلاص ما بتنخطب

حسن مو مستوعب الكلام: وش قلتين ما سمعت؟؟

زينب تصارخ في ادونه: زهروو خلاص ما بتنخطب..يعني افرح واملا الدنيا أغاني انته وزهروو بتاخدون بعض

حسن طاير من الفرحة: تعالي تعالي فهميني السالفة عدل

زينب: زهروو ما عليه بخليش بروحش..بروح اقول السالفة الى حسن وبجي

زهرة منقهرة: تعالي يا طايحة الحظ..لكن بروايش شغلش بعدين..عجل تقولين حساانو اخوي بياخدني

زينب: روحي روحي..بروح الى اخووي بقول ليه السالفة وبعدين راويني شغلي

راحت زينب لحسن وقال تليه السالفة كامل...حسن طبعا شق بوزه شبرين..ومن الفرحة راح طيران الى امه يقول ليها يبي يخطب زهرة

حسن: امااه امااه ابي اخطب

الأم مليحة: بسم الله وش فيك انته اليوم مستجن..وش طاري عليك

حسن: اقول ليش ابي اخطب

الأم مليحة: انزين بندور ليك وحده

حسن: ما يحتاج تدورين يا ام حسن وتعبين روحش..اكو بيت البينه قريب..وملاصق بيتنا..يلا روحي خطبيها ليي قبل لا تطير

الأم مليحة: وش فيك مخرف..البيت اللي تقصدهم ده بيت حجي مكي وبتهم مخطوبه

حسن: لا امااه خلاص ما بتاخد ولد عمها..طلع الفحص انهم ما يناسبون بعض

الأم مليحة: وانته وش دراك؟؟

حسن: توها بتش قايله ليي

الأم مليحة: وديك وش دراها؟؟

حسن: امااه لا تجنيني..زهرة قايله ليها الحين يلا قومي خطبيها ليي

الأم مليحة: بلا جنون عليي..الحين ظهر وتبيني اروح بيت الناس اخطب ليك بتهم!!

حسن: انزين بعدين العصر

الأم مليحة: انته وش فيك مستعجل؟؟ لا يكون كنت حاط عيونك عليها من قبل..ويوم دريت انها انخطبت طحت علينا ومرضت

حسن مستانس على روحه: أي أي اماه

الأم مليحة: مالت عليك ..الحين بنية تسوي فيك جدي..صدق يعني ومن الحب ما قتل..اشوه ما مت

حسن: اماه وانتين وش عرفش بالامثال الخطيرة..

الأم مليحة: لا شايفني هبله ما افهم..قوم انزين عني

حسن: اول متى بتروحين ليهم؟؟

الأم مليحة: يوو ما تستحي..البنيه اكي فوق قاعده روح قول ليها

حسن: صدق..انزين بروح الحين

الأم مليحة: تعال يا اسود الوجه..لا تفشلنا

حسن: انتين تقولين اروح اقول ليها..بروح اعبر ليها عن مشاعري

الأم مليحة: تعال بلا هرار عليي..اني بعدين بروح بيتهم بشوف وش السالفة..وبعدين بكلم ابوك..واذا وافق يصير خير

حسن: بــــــــل كل هذا بتسوينه وانا بس اقعد اصبر لين ما يجي الفرج..الصراحة ما اقدر..وبعدين اخاف تطير مني..كفاي طارت مني المرة الأولى والحمد لله ما صار الشي..بعد تبين الحين احد يجي ويطيرها مني

الأم مليحة: وش قاعد تهر انته تطير وما تطير..جييه هي عصفور لو حمامة

حسن: لا هي زهرة

الأم مليحة: عجل اسكت وانجب وحارس لين ما اقول لابوك

حسن: ومتى بتقولين ليه؟؟

الأم مليحة: وش رايك اروح اقعده الحين من نومته واقول ليه

حسن: أي زين تسوين ..يلا قومي

الأم مليحة: عشان يفلتني اني اياك بره البيت

حسن: افف انزين اذا قعد انا بروح اقول ليه..اعرف انتين ما بتقولين

الام مليحة: والله عاد كيفك..واني وش اسوي فيك

[فاقدة الحنان]

الجزء 17


في الحجرة عند زينب وزهرة

زهرة: تصدقين بطير من الونااسة..مو مصدقة انه اني ما باخد علووو المغرور

زينب: مسكين..ليش تقولين عنه مغرور...

زهرة: لانه مغرور وكلش ما عجبني

زينب: زين عجل ما خديتينه..جان الحين انتون في مصارعه حره..بعد هذا المكتوب

زهرة: ايي لو اخده جان صراخنا يوصل لاخر الفريق..يمكن الفريق اللي ورانا يسمعون بعد

زينب: أي اصدقش...مو بعديه عليش هالسوالف..ههههههه تذكرين في المجمع

زهرة: ههههههههه لا تذكريني..زين اللي جودتيني جان راح فيها الصبي من التشدخ

زينب: قولي زين جا حسن..جان الصبي بيكفخنا قدام الأوادم

زهرة: الحين لا تسوين اخوش الشجاع واحنا ما نقدر نسوي شي..والله اني كنت مسيطرة على الوضع..يعني حتى لو هو ما جاا جان اني قدرت عليه

زينب: حلفي عااد...لو ما جاا جان الدم سال للركب...بعدين عاد مافي يمه ارحميني

زهرة: انزين لا تعكرين عليي مزاجي الحين اني مستانسه..بروح بيتنا بشوف وش الاوضاع عندهم..

زينب: لا قعدي ايايي شوي

زهرة: لا ما اقدر..اخاف تطوفني اللقطة

زينب: أي لقطة؟؟

زهرة: ههه ما ادري بعدين بقول ليش وش يصير من أحداث!!

زينب: اووكي يلا قومي بوصلش

ونزلووا زهرة وزينب الصالة..وكان حسن قاعد ويه أمه ..مغربلنها الا يبيها تروح وتخطب ليه زهرة>>>لو أني من أمه أعطيه سطار على وجه عشان يفكني من حنته

حسن يساسر امه: أماااه اكي نزلت خطيبتي..قولي ليها الحين عااد قبل لا امووت

الأم مليحة: عسااك المووت مللتني غربلتني جووز عاااد

حسن: افااا يام حسن تدعين عليي بموت وهذا بعد انا ولدش الوحيد البجر

الأم مليحة بصوت عالي: قووم عني قووم...متى تعرس وافتك منك

زينب: ايي احنا بنفتك منه ومرته المسكينه بتبتلش فيه

حسن يرفع روحه: والله أنا اللي بتاخدني ليها الشرف..وتحب ايدها بالمقلوب بعد..ما يحصلوون مثلي

زهرة بصوت واطي: اللي يسمع الحين ملك جمال العالم هوو

زينب: هي انتين حدش على اخووي

زهرة: ويي عدال لا يطيحوون شنوصش علينا..بعدين ما نقدر نلايمهم

زينب: هي هي هي هي سخييفة حدش

زهرة: طالعه عليش

حسن: هيي انتين زنبوو لا تغلطين على رفيقتش..ولا تقولين عنها سخيفة..ترى هي احسن منش..مافي مثلها

زهرة بطلت عيونها مستغربة من الكلام: اخووش يقصدني اني!!!

زينب: جزات الخير يا السباال ادافع عنك

حسن: جب جب..محد يغلط على الشيخة

وجان أمه تعطيه ضربة على ضهره

حسن: آآآآآي أمااه وش سويتين!!

الأم مليحة: استح على وجهك يا اسود الوجه..البنيه واقفه!!

حسن: أي ما عليه..كله منش انتين انا قايل ليش...
وقبل لا يكمل كلامه حطت امه ايدها على بوزه

زينب: أمااه وش فيه ولدش مخرف اليوووم

الأم مليحة : ماعليش منه بالع راديوو..مو منه كله من هذا على قولته طايح الحظ اللي ما خلاهم ياكلون اليوم

زهرة: أمشي امشي بطلع قبل لا استجن

زينب: يلا امشي


وراحت زهرة بيتهم..وهي تفكر في كلام حسن..وليش أمه سدت بوزه!!!>>>جاينها فضول الهبلة..تبي تتأكد من الكلام


الأم فخرية: جان ما جيتين يا طايحة النصبة

زهرة: اعووذ بالله...وش صاير عفر؟؟

الجدة تصيح: تعالي يا بتيي... تعالي خلف جبدي

زهرة تسوي روحها ما تدري بشي: أمااه وش صاير قولوا ليي!!

الجدة: يا خلف ابووي انتين..

زهرة تحضن جدتها: جدتي وش فيش تصيحين؟؟..بس سكتي لا تصيحيني ايااش

الجدة: يا بتي خلااص ما بتاخدين ولد عمش

زهرة: حقوويش امااه؟؟ عفر ما تبوني اعرس؟؟

الجدة: لا يا بتي.. بس يقول انه الفحص مالكم ما تصلحون لبعض..

زهرة: ايي ما عليه جدتي ..خيرها في غيرها..واني الحين مو مستعجلة على العرس..بعدي صغيرة

الجدة تمسح دموعها: لا يا بتيي..اني من زمان ابيكم تاخدون بعض..انتون افنيناتكم طايحين على بعض

زهرة: الحين جدتي خلي عنش هالهرار..الله مو كاتب ناخد بعض

الجدة: لكن خسارة يا بتيي...

زهرة: لا خسارة ولا شي

الجدة: اني كنت اخاف انش تعلقتين فيه!!

زهرة شوي وتفقعها تضحك: حقويش اتعلق بعد...جي هو حبال عشان اتعلق عليه

الجدة: ما تجوزين عن مصاختش

بعدين زهرة راحت حجرتها... وفي بالها يدور ألف سؤال وسؤال...حسن وش كان يقصد بكلامه هذا؟؟؟
طنشت السالفة وقعدت تفكر بالاشياء اللي بتسويهم الحين..الجامعه والليسن>>>يا ربي احنا بنمووت على الليسن

[فاقدة الحنان]

الجزء 18
اليوم اللي بعده

في الشغل كالعاده عند حسن وكريم


حسن والطرب ماخذنه من الصبح: بلغ حبيبك وقله باخدك منه..هذا هو الحل وما لي أي حل ثاني..ما اقدر صبر اشوفك بس واستني...

كريم: او او او وش عنده الحبيب من الصبح يغني

حسن: اسكت عني انا اليوم مفرفش حددديي

كريم يحط ايده على جبهة حسن: اشوف...لالا حرارتك طبيعية..مو مسخن!!

حسن: ياخي انا حالتي الصحية والنفسية احسن منك ومن اليي قاعد هناك واليي قاعد مناك واليي قاعد داك الصوب

كريم: سبحان مغير الأحوال؟؟وش اللي قلب الحال؟؟قول ليي وش الدوى اللي خلاك تصير جدي

حسن: لا دوى ولا أعشاب..طبيعي يا حبيبي

كريم: قول قول السالفة شكلها خطيرة

حسن: هههه اسمع..بس لا تعكر مزاجي بصوتك المزعج

كريم: انا لو ما ابي اعرف السالفة جان الحين هفيتك بطراق واحد يسندرك

حسن: ههههه او او هوق هوقن ماشاءالله

كريم: قول وخل عنك الطنااز

حسن: اول جم تعطيني..لأن هالخبر يسوى الملااايين

كريم: اذا عندك فلووس عطني مو انا اعطيك

حسن: بس خلاص ما بحرق اعصابك اكثر..هذا الله يسلمك زهرة خلااص ما بتنخطب من ولد عمها

كريم: جيفه؟؟

حسن: الفحص طلع ...والحمد لله طلعووا ما يناسبون بعض

كريم: خساارة ..يا حراام!!

حسن : هيي انته وش الخسارة الحين انا رفيقك كنت بموت لا سمح الله لو اخدها ولد عمها

كريم: ايي خسارة طافنا الموقف..جان بنشووف وش بتسوي في ليلة خطوبتها!!

حسن يدور على شي يفلع به كريم

كريم: وش تسوي...شي ضايع منك!!

حسن: ادور على مخك يا القوطي...انت غبي..

كريم: هههههههههههههه احب انرفزك ما ادري حقويش؟..ويوم اللي ما انرفزك انا اتضايق وااجد

حسن: قوم عني لا ادبحك

كريم: انزين بس خلاص بسكت عنك

حسن: أي صير عاقل

كريم: انزين الحين انته عجل بتتقدم ليها!!

حسن شاق الحلق: أي

كريم: مستانس..الله لينا

حسن: وش انته بعد..لا يكون تغار مني

كريم: لا تخاف عيوني مو حاارة مثلك

حسن: ما بعكر مزاجي لاني مستانس حدي..بسكت عنك هاليومين

كريم: ايي اللي ايده في الماي مو مثل اللي ايده في الناار..>>ويأشر على روحه

حسن: أي ماي واي ناار صل على النبي

كريم: اللهم صل على محمد وال محمد..انزين ما قلت ليي متى بتروح تتقدم

حسن: انا للحين ما قلت للوالد..احارس الوالده تفاتحه بالموضوع وبعدين نروح

كريم: عجل ما بقيت الا انا

حسن: يا رجاال يلا عرس وش وراك..الحمد لله مو ناقصنك شي

كريم نزل راسه: وحسين؟؟

حسن: حسين وش فيه بعد؟؟

كريم: من اللي بترضى تاخدني وانا عندي ولد..محد بيتحمل فيه..اخاف اخد وحده كله تتعلم تضربه

حسن: اصابعك مو سواا..في بنات ناس ومربين..ويعرفون الأصول

كريم: بس...

حسن: لا بس ولا شي وانته عورت راسي بهالسالفه..حقويش منته راضي تقتنع

كريم: اقتنع بوييش؟؟

حسن: اوو انا اقول لازم تخترب فرحتي..والحين انته بتخربها

كريم: بس خلاص بسكت

حسن: لا صدق كريم...يعني انته الى متى بتظل على هالحال..

كريم: وش فيه حالي!! مو عاجبنك؟؟

حسن: اكيد مو عاجبني....الحين انا اذا خطبت..والربع كل واحد بيخطب..وانته وينه بتروح..بتقعد بروحك

كريم: الحين انته هذا اللي هامنك...عادي ما بضيع بقعد في بيتنا

حسن: انته فكر بالمنطق...الحين انته ما تفكر تكون أسرة...يصير عند زوجة وولاد وتحس بالمسؤولية

كريم: اكوو عندي ولد

حسن: بس مو عندك كله اغلب الاوقات عند امك..وامك يا كريم مرة كبيرة...يعني ما تقدر تهتم في ولدك على طوول..وولدك الحين كبر..يعني يحتاج تكون انته اياه يحتاج احد يدرسه يهتم فيه..ويعلمه الصح من الغلط

كريم: ادري كلامك كله صح

حسن: بس عجل توكل على الله وخل امك تدور لك وحده

كريم: بفكر في الموضوع اول

حسن: وش تفكر بعد..ما يحتاج تفكير الموضوع..يلا قول لامك قبل لا يخلصوون بنات الديرة

كريم: مو مشكله نجيب من بره

حسن: من حلاتهم مال بره..بنات الديرة ذهب..مافي منهم>>> احم احم..يعني احنا فهمتوون

كريم: أي عاد لين جتك وحده تتشرط وتتدلع ترفع ضغطك على ما توافق عليك..دلين لو عليي اخدهم واطيح فيهم تشدخ يقهرووني

حسن: هههههههه لا يكون تقدمت حق وحده وتشرطت عليك

كريم: يخسوون الا هم..اقعد عزابي ولا اخد وحده تطلب ليي لبن العصفوور

حسن: هههههههه أي والله صادق..كأنهم قاعدين في منافسة..كل وحده تاخد أكثر من الثانية مهر..لا واللي تقول ليك ابي اسوي في هالصالة واللي تبي في فندق واللي تبي تجيب ليها فرقة..بلااوي بلااوي..ما ت